2012an Elgetako 52 familiak kudeatzen zuten euren hondakin organikoa. Iaz, 113 familia ziren. Kopuru horrek gora egiten jarraitzea gura du Udalak. Hala, Egin konpostatzaile kanpaina jarri du martxan. "Hondakin organikoa Elgetan bertan kudeatzen badugu, ez dago garraiatu beharrik, ez dago tratatu beharrik, ez dago zabortegietan pilatu beharrik", gogorarazi dute.
Bonifikazioak
Bonifikazioak ere iragarri ditu Udalak ekimenean parte hartzen duten herritarren artean. %25eko bonifikazioa iragarri dute hondakinen tasan, eta baserritarren kasuan,%50ekoa. "Hondakin organikoa baserriko abereei jaten emateko erabiltzen dutenek ere eska dezakete hobaria", esan dute. Berehala hasiko dira bonifikazioak aplikatzen: 2013an konposta egin dutenei otsailean bueltatuko zaie bonifikazioaren kopurua eta izena 2014an ematen dutenei konposta egiten dihardutela ziurtatu ostean aplikatuko zaie, urtea bukatu aurretik betiere.
Otsailaren 17ra arteko epea zabaldu du Udalak interesatuek izena eman dezaten.
Sailkatzeko zaborrontziak
Kalean ere zaborra sailkatzeko aukera zabalagoa dago orain. Hasieran, bost gune ipini zituen Udalak —kiroldegian, frontoian, Maala parkean, eskola aurrean, herriko plazan eta poligonoan—. Orain, beste sei gehitu ditu eta horretarako aurretik zeuden zaborrontziak egokitu ditu: "Zaborrontziak kendu eta berriro ipini ditugu bakoitzean ze hondakin mota bota behar den zehaztuz (...) Gune horietan lau frakzioendako ontziak daude: organikoa, ontzi arinak, papera-kartoia eta errefuxa". Txakur kakak botatzeko lekuak ere ipinita daude Torrealdean, Domingo Iturben, San Roke ostean, industrialdean eta Berraondokoan. "Gogoratu gura dugu txakur kakak beste guneetan ere bota daitezkeela, errefuxaren ontzira".
Udalak etxean moduan kalean ere hondakinak sailkatzera animatu gura ditu elgetarrak.