Uztailean promotoreak egin zuen eskaeraren ostean, Subero eta Durakogain parke eolikoen aurretiazko baimenaren eskaera eta ingurumen-inpaktuaren azterketa publikatu du gaur, martitzena, Eusko Jaurlaritzak, aldizkari ofizialean. Hain zuzen, 9,9 megawatteko (MW) proiektua eta 16.886.731,87 euroko inbertsio materiala izango luke (BEZ gabe), Eskoriatza eta Aramaio artean banatuta.
Goldwind fabrikatzailearen bi aerosorgailu instalatzea aurreikusten du Alerion Spain promotoreak, 110 metroko altuera eta 170 metroko diametroa dutenak, 83,3 metroko palekin. Aldizkarian jasota dagoenez, "turbinek, 7,2 megawatteko potentzia nominala" duten arren, "bakoitzak 4,95 megawatteko gaitasuna izango luke, espedienteko 9,9 megawattekin batera sarera isurtzeko eta urtean 43.362 megawatteko sorkuntza garbia lortzeko".
Proiektuaren arabera, Aramaioko mendietan bi aerosorgailu eta neurketa meteorologikorako dorre bat kokatuko lirateke. Ebakuazio elektrikoa, halaber, lurpean joango litzateke, 30 kilovolteko goi-tentsioko lineen bidez –3,7 eta 2,9 kilometro–, Eskoriatzako sekzionamendu zentro berri bateraino. Han, Iberdrolaren i-DE banatzailearen Arrasate-Eskoriatza 1 linearekin konektatuko litzateke.
Aldizkarian gaur argitaratuta, orain 30 egun balioduneko epea dute partikularrek, erakundeek eta gizarte-taldeek dokumentazioa kontsultatu eta alegazioak egin ahal izateko.