Aramaio eta Eskoriatza artean zentral eoliko bat egiteko eskaera egin du Alerion Spain SL enpresak eta berehala iritsi da Aramaixo Bizirik taldearen erantzuna. "Urtarrilean, Espainiako Gobernuak atzera bota zuen Statkraft enpresak aurkeztutako Itsaraz proiektua, ingurumenean eduki zitzakeen ondorioak oinarri hartuta. Orain, aldiz, beste proiektu bat eraiki nahi dute, toki berean. Honek agerian uzten du 'trantsizio energetiko' honen zentzugabekeria eta fartsa", salatu dute.
Horrekin batera, adierazi dute borrokan jarraituko dutela. "Lanean jarraituko dugu gure lurrak eta mendiak ez daitezen gutxi batzuen irabaziak handitzeko merkantzia huts bihurtu, eta aramaioar oro animatzen dugu ekarpena egitera aurretik daukagun bide honetan".