Martxan da dagoeneko Gipuzkoan 2024ko errenta aitorpenaren kanpaina, Foru Aldundiko Ogasuneko ordezkariek azaldu dutenez, aurten 422.000 aitorpen jasotzea aurreikusten dute: horietatik 304.000 itzultzekoak edo zero emaitzakoak izango dira eta 118.000, aldiz, ingresatzekoak. Hala, 75,4 milioi euro itzuliko ditu guztira Ogasunak
Aurreko urteetan bezala, errenta aitorpena egiteko hiru modu egongo dira. Etxean jasotako autolikidazio proposamenak dira horietako bat. Aurten 285.595 proposamen bidali dituzte, eta astelehenaz geroztik onartu ditzakete: halaxe egin dute lehen bi egunetan 46.094 gipuzkoarrek.
Aitorpen mekanizatua, apirilaren 8tik
Aitorpen mekanizatua, aitorpena aurrez-aurre egitea da beste aukera bat. Apirilaren 8tik aurrera egongo da horretarako aukera eta bihar, apirilak 4 zabalduko dute hitzordua hartzeko epea.
Foru Ogasunak Gipuzkoako 9 herritan 11 bulego jarriko ditu errenta mekanizatua egin ahal izateko; Debagoienean, Bergarako bulegoak hartuko ditu herritarrak. Guztira 184 pertsonaz osatutako lantaldea ariko da aurtengo kanpainan.
Errenta aitorpena egiteko hirugarren modalitatea Internetez da, Zergabidea-ren bidez. Gaurtik dago zabalik aukera hori.
Errenta aitorpena euskaraz
Kanpainaren aurkezpenean aitorpena euskaraz egitera animatu ditu gipuzkoarrak Ogasun eta Finantzetako foru diputatu Itziar Agirrek. Eta deialdi bera egin dute beste zenbait erakundek ere, tartean, UEMAk eta Debagoieneko hainbat udalek. Arrasatekok, Oñatikoak eta Bergarakoak, esaterako, eskuorri bat banatuko dute etxez etxe aitorpena euskaraz egiteko jarraitu beharreko urratsekin. Bertan, era berean, errenta aitorpenaren bueltan erabiltzen diren kontzeptuen inguruko euskarazko hiztegitxo bat ere jarri dute.
Urteak pasatu ahala gero eta gehiago direla errenta aitorpena euskaraz egiten dutenak. Hala, UEMAK emandako datuen arabera, Debagoienean, antzuolarrak dira errenta aitorpena euskaraz gehien egiten dutenak; %44k horren alde egiten duelako. Beste muturrean Arrasate dago, %21arekin.
Araba, apirilaren 7an
Arabari dagokionez, apirilaren 7an hasiko da errenta aitorpenaren kanpaina eta gaurtik dagoeneko kontsultatu daitezke proposamenak.
