Debagoienean Errekak Bizi Auzolanean ekimeneko kideek hitzaldiekin, ikus-entzunezkoen emanaldiekin, eta bisita gidatuekin osatutako egitaraua bateratua aurkeztu dute. Errekak auzolanean garbitzeko dei egin dute hilaren 19rako. Ekintza sorta sentsibilizazioan sakontzeko eta auzolana prestatzeko izango da.
"Debagoiena mailako hirugarren erreka auzolana ate joka dugu. Aurten ere, bailarako herri guztiak izango gara horren parte. Aurreko urteetako kopuruak errepikatuz gero, 500 lagunek baino gehiagok Leintz Bailaratik hasita bailara zeharkatzen dituen urak ezagutu eta ingurua zainduko dugu", azaldu dute. "Antzuolako herritarrak izango dira sartuko diren lehenak, ausart! Urriaren 12an egingo dute auzolana. Beste herri guztiak, berriz, urriaren 19rako adostu dugu Erreka Bizi auzolan erraldoiaren eguna.
Erreka garbiketa baino gehiago
Erreka auzolanean garbitzeaz gain bestelako erronkak ere baditu ekimenak. "Ekimen horren bueltan bailarako herrietako batzordeek ekintza ezberdinak antolatu ditugu, eta horrekin egitarau bateratua osatu dugu. Antolaturiko ekimenek Deba ibaia eta bere arroa ezagutu eta honen inguruan hausnarketak sustatzea dute helburu nagusi".
Hona hemen iragarrita dauden hitzaldiak, emanaldiak eta bisitak.
Urriak 15, martitzena
- Elgeta. 17:30-19:30 artean baso bainua Asentzion. Elgetako Aste Berdearen barruan.
- Bergara. 18:30ean Olaso Dorrean, Joserra Diezen hitzaldia. Bergarako ibai-sarea nola hobetu? Hausnar dezagun elkarrekin.
- Oñati. 19:00etan kultura etxean, Ta argiya in zan ikus-entzunezkoa eta solasaldia. Urumeako zentral hidroelektrikoei buruzko lan artistikoa. Eli Pagola Apezetxeak eta Ainhoa Gutierrez del Pozoren lana.
Urriak 16, eguaztena
- Aretxabaleta. 18:00etan Arkupeko goiko gelan Arturo Elosegiren hitzaldia. Erreken garbiketatik errestauraziora.
- Arrasate. 18:00etan elkarguneko sarrera nagusitik abiatuta araztegira bisita.
- Oñati. 19:00etan kultura etxean Lurpeko ura, babestu beharreko altxorra hitzaldia Inma Mugerza Perello geologian doktorearen eskutik.
Urriak 17, eguena
- Aramaio. 18:30ean kultura etxean, Ander Izagirreren hitzaldia narrastien eta anfibioen inguruan.
Urriak 18, egubakoitza
- Oñati: 19:00etan kultura etxean Ja! Uraren krisia Chiapasen dokumentala eta solasaldia. Ane Nafarrate, Ihana Iriondo eta Aitziber Jimenez de Aberasturiren dokumentala da.
