Atzo urrutira gelditu zen ekaitza eta ez zuen lur hartu Debagoienean, baina gaurkoan heldu da. 18:00etatik aurrera probabilitate handiago zegoen iragarrita, eta halaxe izan da.
Lau zentimetroko txingorra
Elgetan, 18:00ak bueltan neurri handiko txingorra bota du. Lau zentimetrotik gorako kazkabarra egin du eta zenbait tokitan ur asko pilatu da. Hala, Elgetatik Elorriorako GI-2632 errepidean, 34. kilometroan, ur-putzu handia sortu dela jakinarazi dute Segurtasun Sailetik zirkulazio arazoak eraginez.
Debagoieneko gainerako herrietan ere erruz egin du euria. Euskalmetek jasotako datuen arabera Arrasaten 12,6 mm bota du 10 minutuan, Oñatin 10,7 mm, Aixolan 5,9 mm, eta Elorregin, 5,4 mm.
Ekaitzaren ostean eguraldia baretu bada ere, alerta laranja 22:00ak arte dago ezarrita eta baliteke zaparrada gehiago egotea.