Bilakaera negatiboa izan du langabeziak urtebetean Debagoienean. 2.386 langabe zeuden 2022ko urtarrilean, baina ordu hartan baino 37 pertsona gehiago zeuden lanik gabe urtea amaitzearekin batera, iazko abenduaren azkenetan; hain justu, 2.423 langabe debagoiendar.
Hilabeteek aurrera egin ahala, beraz, gorabeherak izan arren, langabezia kopuruak gora egin duela argia da. Eta horrela egin du azarotik abendura bitartera ere. 2.379 langabe zeuden bailaran azaroan, baina aurreko hilabetean baino 44 langabe gehiago izan dira abenduan. Gaur-gaurkoz, 2.423 langabe izanda, %7,88koa da langabezia-tasa bailaran —azaroan, %7,74koa zen—.
Herrietako egoerari dagokionez, gorabeherak daude bataren eta bestearen artean; ez dago joera jakin bat. Aretxabaletan, zazpi pertsona gehiago daude lanik gabe, Arrasaten 31 dira, Elgetan bi eta Oñatin, berriz, 25. Leintz Gatzagan, berdin mantendu da kopurua, bost langabe daude, eta gainontzeko herrietan, behera egin du: Antzuolan, hiru langabe gutxiago daude; Aramaion, bi; Bergaran, hamar; eta Eskoriatzan, sei.
Hurrengo taulan daude herri guztietako datuak:
| Herria | Abenduko langabeak |
Azaroko langabeak |
Azken bi hilabeteetako aldea |
Abenduko langabezia-tasa |
| Antzuola | 69 | 72 | -3 | %6,36 |
| Aramaio | 6 | 8 | -2 | %0,86 |
| Aretxabaleta | 197 | 190 | +7 | %5,73 |
| Arrasate | 1.107 | 1.076 | +31 | %10,90 |
| Bergara | 498 | 508 | -10 | %6,94 |
| Elgeta | 32 | 30 | +2 | %5,39 |
| Eskoriatza | 160 | 166 | -6 | %8 |
| Leintz Gatzaga | 5 | 5 | = | %4,17 |
| Oñati | 349 | 324 | +25 | %6,44 |
| GUZTIRA | 2.423 | 2.379 | +44 | %7,88 |
Araban, Bizkaian eta Gipuzkoan, 4.047 langabe gutxiago
Arabako, Bizkaiko eta Gipuzkoako langabeziaren egoeraren berri ere eman du Eusko Jaurlaritzak, eta azaldu duenez, 2022an aurreko urtean baino 4.047 langabe gutxiago izan dira; guztira, 110.789 pertsona zeuden lanik gabe urtea amaitzean.
Idoia Mendia Lan eta Enplegu sailburuak eman ditu datuak, eta datozen urteetako erronkak izan ditu gogoan: "Azken urte honetan baieztatu da Euskadi indartsu dagoela erronkei aurre egiteko. Horniduren, inflazioaren eta energiaren arazoen krisiaren urtea izan da. Eta aldi berean, langabeziak behera egin du lurralde guztietan, gizonen eta emakumeen artean, sektore guztietan eta adin guztietan".
Haren arabera, abenduko datuek erakusten dute "Euskadiren berreraikuntza sozial eta ekonomikoaren bidea zuzena dela", eta besteak beste, "egokiak" izan direla enplegua babesteko neurriak. Beraz, baieztatu du urte honetan ere enplegua sortzen jarraituko dutela.