Gizarteko datu orokorren bidetik, Gipuzkoako adinekoen egoitzetako kutsatze kopuruek ere goranzko joeran dira azken hilabetean. Ekainaren lehen hiru asteetan balioak 30 positiboren bueltan mantendu ziren arren, gora egin dute nabarmen kasuek azken bi asteetan; hots, 91 positibo zenbatu ziren duela bi aste, eta 83 izan dira azken asteko kutsatu berriak.
Debagoieneko egoitzetako egoera ez da salbuespena. Hiru ziren ekainaren 21ean jakinarazi ziren kasuak; zazpi joan zen astekoak; eta, sei, aldiz, azken zazpi egunetakoak. Hurrenez hurren, lau eta bi izan dira Aretxabaletako Debagoiena egoitzan eta Oñatiko San Martin egoitzan erregistratu diren positiboak. Kasuen gorakada honen aurrean, baina, bada datu baikor bat: Aste Santutik ez da egoiliarrik zendu bailarako adinekoen egoitzetan.
