Euskal Meteorologia Agentziak Debagoienean dituen neurgailuen arabera, 15:10ean Elorregin erregistratu zen atzo bailarako tenperatura altuena: 35,9 gradu. Oñati (35,4º), Arrasate (35,2º) eta Urkuluko (33,7º) termometroek ere erraz gainditu zituzten 30 graduak. Eta tenperatura altuek ez dute etenik izango; iragarpenen arabera, ez behintzat zapatura arte.
Hala, lau abisu hori ezarri ditu Euskalmetek gaur eta biharko. Muturreko tenperatura oso altuak espero dira gaur 14:00etatik 18:00etara eta bihar 13:00etik 19:00etara. Eta horrez gain, tenperatura altu iraunkorraren bi alerta ere aktibatu ditu agentziak; eguneko minimoak 20 graduko langatik ozta-ozta jaistea espero da, eta maximoak, berriz, gertuago izango dira 40 graduetatik 35etik baino.
Bainu denboraldia, martxan
Bero olatuaren hasieran, asko izan ziren atzo igerileku, ur-jolas parke eta putzuetara hurbildu ziren debagoiendarrak. Salbuespenak salbuespen, abian da herri guztietan bainu denboraldia. Hona herriz herriko bainutoki publikoen egoera:
- Antzuola - Ur-jolas parkea zabalik
- Aramaio - Ur-txorrotak itxita (konpontze lanetan ari dira)
- Arrasate - Villa Amparo eta Santa Barbarako ur-parkeak zabalik. Zapatuan, ekainak 18, irekiko da Musakolako kanpoko igerilekua.
- Bergara - Astelehenetik zabalik da Agorrosingo kanpoko igerilekua.
- Eskoriatza - Kiroldegiko haurrentzako igerilekua zabalik.
- Oñati - Ugarkaldeko ur-uhinen parkea zabalik. Usakon debekatuta dago bainatzea ekainaren 15etik.