Eusko Jaurlaritzak egoera epidemiologikoaren inguruan argitaratutako txostenak ondorio argi bat bistaratzen du: goranzko joeran dira datuak, eta bilakaerak ez du etenik. Atzera begiratuz gero, martxoaren 14ko eguneraketan izan zen bailarako astebeteko daturik baxuena: 57 kasu berri. Ordutik, pixkanaka gora egin dute balioek, azken zazpi egunetan zenbatu diren 244 positiboetaraino. Bi hilabete eskasean %328an hazi dira kasuak.
Herrikako datuei erreparatuz gero, badira maiatzeko lehen astean gorakada nabarmena izan duten lau herri: Antzuola, Aramaio, Eskoriatza eta Oñati. 18 kasu hauteman dira lehenean (+14), 10 bigarrenean (+9), 14 Eskoriatzan (+9), eta ia bikoiztu egin dira kasuak Oñatin (+35). Aretxabaletan ere gora egin dute positiboek, igoera apalagoa izan den arren (+2).
- Grafiko eta datu guztiak ikusgai daude goiena.eus-eko azken datuak atalean.
Lerroak, okertzen
Aldaketa txikiak izan ziren martxotik apirila erdialdera arte intzidentzia-tasen grafikoan. Azken lau asteetan, baina, goranzko joera nabarmena hartu dute lerroek, eta esponentzialki hasi dira hazten. Uneotan, 682,74an da bailarako tasa, duela astebete baino 145 puntu gehiagoan. Antzeko bilakaera atzeman liteke Hego Euskal Herriko lau probintzietan ere.
Ospitaleak, egonkor
Gorakadaren iluntasunean, baina, bada esperantzarako argi printzarik. Izan ere, apenas aldatu da Euskal Autonomi Erkidegoko ospitaleetako egoera azken zazpi egunetan –eguaztenean eguneratuko ditu datuak Nafarroako Gobernuak–. 317 ospitaleratu zeuden maiatzaren lehenean Araban, Bizkaian eta Gipuzkoan; 324 dira astebete geroago –251raino jaitsi zen datua egubakoitzean–. ZIUetan, aldiz, 11 herritar zeuden hilabete hasieran; hiru gutxiago ziren atzo (8).
