Martitzenetik giro euritsu eta hotza da nagusi Debagoienean, eta aurreikuspenen arabera, hala jarraituko du datozen egunetan ere. Hala, Euskal Meteorologia Agentziak gaur iluntzerako ezarri zuen abisu horia mailaz igoko da orduek aurrera egin ahala; hots, egubakoitzean eta zapatu goizean alerta laranja egongo da indarrean bailaran.
Euskalmetek iragarri duenez, 700-900 metrotik 200-300 metrora jaitsiko da egubakoitz goizaldean elur-kota –Bergara salbu, 200 metrotik gora daude bailarako herri guztiak–. Egunak aurrera egin ahala igotzen joango da aipatutako kota, baina zapatu goizaldean minimo horietan berriz zuritzea aurreikusi dute adituek. Ondorioz, egubakoitz goizaldetik –00:00– zapatu goizera –10:00– ezarri dute abisu laranja.
Etenik ez
Zapatuan zehar elur maila igotzen joango den arren, alerta egoera mantentzeko hautua egin du Euskalmetek. Zehazki, laranjatik horira igaroko da abisua zapatu goizetik eguna amaitu bitarte. Tenperaturetan aldaketarik espero ez den arren, domekan prezipitazioak etengo direla adierazten dute iragarpenek.
