Seigarren olatuak urtarrila hasieran jo zuen goia, eta badirudi jaitsierak ere ukitu duela behea. Hala ondorioztatu liteke, bederen, Eusko Jaurlaritzak eta Nafarroako Gobernuak azken bi asteetan egindako datuen eguneraketetatik. Eta iragan eguenera arte Debagoiena salbuespenetako bat zen arren, Hego Euskal Herriko gainerako lurraldeen joerara batu da azken egunotan.
79 kasu berri hauteman dira bailaran azken astean, martxoaren 7tik 13ra atzeman zirenak baino 22 gehiago. 13na positibo gehiagorekin, adierazgarrienak Arrasate eta Bergararen gorakadak izan dira. Gorabeherak gorabehera, gainerako herrietan apenas aldatu da egoera, eta mantendu egin dira balioak.
- Grafiko eta datu guztiak ikusgai daude goiena.eus-eko azken datuak atalean.
Kurban sartuta
Kasu berrien bidetik, intzidentzia-tasak kurban sartuta daude. Bailarako balioa 212,48an da, eta azken lau egunetan 14 puntuan egin du gora. Bestelakoa da Hego Euskal Herriko probintzien egoera, bikoiztu egiten baitute Debagoieneko tasa; zehazki, 453,68an da Bizkaia, 477,88an Araba, 536,33an Gipuzkoa eta 560,59an Nafarroa.
Kolore aldaketak
Debagoieneko mapak koloreztatuta jarraitzen du, baina izan da aldaketarik. Tasen gorabeherak baino, aipagarriena Aretxabaleta (169,49) eremu gorrira itzuli eta Eskoriatza (121,86) eremu laranjara pasa izana da. Gainontzean, eremu berean jarraitzen dute Gatzagak (0,00), Elgetak (88,42), Antzuolak (137,68) eta Oñatik (148,24).
Egonkor
Hego Euskal Herriko erietxeetako egoerak apenas izan du aldaketarik. Behera egin dute ospitaleratuek iragan astelehenetik (-62), baina 225 eta 189 artean dabil geroztik; uneotan, 221 dira ingresatuta dauden herritarrak. ZIUetan, aldiz, 28 pertsona zeuden atzo, duela zazpi egun baino bost gutxiago.
