Joan zen astelehen eta egueneko datuen eguneraketetan jaitsiera eten izana atzeman bazitekeen, Eusko Jaurlaritzak eta Nafarroako Gobernuak emandako azken datuak ez dira baikorrak. Pixkanaka bada ere, gorantza hasi dira berriz pandemiaren adierazle nagusiak. Hitzetatik zenbakietara, otsailaren 28aren eta martxoaren 6aren artean 6.086 kutsatu hauteman ziren Hego Euskal Herrian; joan zen astean, aldiz, 6.634. %9ko gorakada, alegia.
Debagoienean, baina, oraindik ez da joera aldaketarik eman. Egun berdinak aztertuta, 69 herritar kutsatu ziren duela bi aste, eta 57 azken astean; ondorioz, ia %18an jaitsi da positibo kopurua. Aretxabaletan (+5), Aramaion (+3) eta Elgetan (1), baina, gora egin dute kasuek.
- Grafiko eta datu guztiak ikusgai daude goiena.eus-eko azken datuak atalean.
Intzidentzian, pareko
Antzeko bilakaera irudikatzen du intzidentzia-tasari dagokion grafikoak. Badirudi Araba, Bizkaia, Gipuzkoa eta Nafarroako balioek jo dutela behea, eta goranzko joerari ekin diotela berriz; Debagoieneko lerroak, baina, beherantz jarraitzen du. Adierazgarria da bailara eta probintzia alderatzea, izan ere, Gipuzkoa da goranzko joera nabarmenena duen lurraldea; hots, ia 100 puntuan hazi da tasa azken 10 egunetan.
Kolorez jantzia
Eguaztenera arte Aretxabaleta eta Elgeta ziren eremu gorritik kanpo ziren bailarako bi herriak –eremu berdean ziren biak–. Bada, bi herri batu zaizkie, eta gainera, kolorez aldatu dute biek. Gatzaga (0,00) da uneotan eremu berdean dagoen Debagoieneko herri bakarra; horiz dira Elgeta (88,42) eta Aretxabaleta (98,87); eremu laranjara sartu berri esnatu da, aldiz, Antzuola (137,68).
Gora berriz
Datuen eguneraketako baliorik makurrenak, baina, ospitaleetako egoerarenak dira. Joan zen eguaztenean 189ko langara iritsi zenetik, gora egin du Hego Euskal Herrian erietxeetako zaintza behar duen herritar kopuruak; 254 ziren atzo. Zainketa intentsiboa, aldiz, 37 herritarrek behar zuten.
