Dikar Kooperatiba
Iazko abenduan bozkatu zuten Dikar Kooperatibako bazkideek 40 urte baino gehiagoa Bergaran egon den enpresaren egoitza Arrasatera leku-aldatzea. Larramendi industrialdean paper-industriako hondakinak tratatzeko planta bat kokatzeko aukerak sortutako ziurgabetasunaren harira egin zuten orduan bozketa.
Hala, joan zen astean erosi zuen Mondragon Taldekoa den Kooperatibak Arrasateko Garagartza auzoan dagoen, Fagor Etxetresna Elektrikoena izan zen 2019tik hutsik dagoen nabea. 72.000 metro koadro ditu, eta 2023an eramango dute bertara jardueraren zatirik handiena, hazten eta enplegua sortzen jarraitzeko asmoarekin.
Ehizaren, kirol tiraketaren eta aire zabaleko kirolaren sektoreko hainbat markaren jabe da, Dikar, eta Bergarako instalazioen, eta, Portugalen eta Amerikako Estatu Batuetan dituen filialen artean 250 pertsona baino gehiagoko taldea osatzen dute. 2021ean, Dikarren salmenta bolumena 90 milioi eurotik gorakoa izan zen, nazioarteko salmenten ehunekoa %97koa izanik.
Ekide Group
Ingeniaritzan eta fabrikazio industrialean jarduten duen enpresak, Arrasateko instalazioez gain, Bizkaian, Mexikon eta Txinan ere baditu lantegiak. Enpresatik jakinarazi dutenez, hamar urtetan hazkunde garrantzitsua izan du Ekidek: gaur egun 225 langile ditu, eta 2021ean 35 milioi euro fakturatu zituen.
Erositako instalazio berriekin egungo gaitasun industriala nabarmen handitu nahi du Ekidek, eta hurrengo lau urtetan 80 lanpostu berri sortzea aurreikusten du. Egokitzapen lanak 2022an egingo dituzte eta 2023an hasiko dira bertan lanean, enpresatik azaldu dutenez, modu progresiboan.
Ekide Groupek Fagor Etxetresnen San Andreseko lantegi zaharra erosi izanaren harira, Arrasateko PSE-EEk adierazi du albiste ona dela eta era berean, enpresari eskatu dio lan-eskaintzetan arrasatearrek lehentasuna izatea.
