Aratusteen atarian, 49 kasu berri hiru egunean

Jon Irizar Aranguren 2022ko ots. 24a, 13:43

Osasun Sailak egindako eguneraketaren arabera, 49 kasu atzeman dira astelehenetik eguaztenera bailaran, joan zen astean baino 44 gutxiago. Intzidentzia-tasa 568,69an da, eta bada eremu laranjara hurbiltzen ari den herririk ere. Hego Euskal Herrian 373 herritar daude ospitaleratuta –2 Arrasateko Ospitalean–, eta horietatik 69k behar dute zainketa intentsiboa.

Duela hilabetetik gora hasitako beheranzko joerari eusten diote egoera epidemiologikoaren bilakaera adierazten duten datuek. Kasuen eta intzidentzia-tasaren joerari erietxeetako egoera batu zaie azken egunetan, datuei so eginez gero, arintzen ari baita Hego Euskal Herriko ospitaleetako presioa.

Debagoieneko kutsatu berriei dagokionez, 49 kasu hauteman dira astelehenetik eguaztenera; 124, aldiz, azken astean. Zazpi egun atzera eginez gero, 93 (+44) eta 240koak (+116) ziren bi balioak. Halaber, adierazgarria da azken hiru egunetako kutsatuen herrikako banaketa; kasuen %47a Oñatin atzeman da (23), eta %24a Arrasaten (12).

  • Grafiko eta datu guztiak ikusgai daude goiena.eus-eko azken datuak atalean.

Eremu berrietara hurbiltzen

Intzidentzia-tasa 600eko langatik behera da uneotan bailaran (568,69), Araban eta Bizkaian bezala. Gertu dira zifra horietatik Nafarroa eta Gipuzkoa ere. Debagoieneko mapan ikusi daitekeen bezala, badira eremu laranjara hurbiltzen ari diren herriak ere; 353,11ko tasarekin, Aretxabaleta dago gertuen.

Adibide gisa, 11 udalerri daude soilik eremu gorritik kanpo Gipuzkoan (guztiak berdean, zehatz esanda), baina bakarrak ere ez du 600 biztanle baino gehiago –Aduna, Altzo, Arama, Beizama, Belauntza, Errezil, Gaztelu, Larraul, Leaburu, Orendain eta Orexa–.

Presioa arintzen

Erietxeetako egoera kasuen eta intzidentzia-tasen beheranzko joerari batu zaie azken egunetan. Izan ere, 373 ospitaleraturekin, pasa den eguenean baino 119 eri gutxiago zeuden atzo Hego Euskal Herriko erietxeetan. Antzeko egoera irudikatu liteke Zainketa Intentsiboen Unitateetan ere; 69 herritar daude uneotan, duela zazpi egun baino 12 gutxiago.

Kutsatu berri eta hildakorik ez

Asteartean eguneratu zituen Gipuzkoako Foru Aldundiak probintziako adinekoen egoitzetako datuak, eta azken asteetako daturik positiboenak izan ziren bailarako egoitzei dagokionez: ez da ez kasu berririk atzeman, ezta egoiliarrik zendu azken astean. Ondorioz, kasu positibo bakarra dago uneotan bailarako zentroetan; zehazki, Bergarako Mizpirualde egoitzan dago gaitza duen herritar bakarra. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak