Ekitaldia hasi eta saria jasotzen lehena izan da Luis Ugalde jesuita bergararra. "Ekintzaile sozial eta erreferente moral zein politiko" izateagatik saritu du Sabino Arana Fundazioak, "erregimen venezuelarraren bidegabekeriak salatzen aritu den ahotsetako bat delako".
Bergararra hunkituta agertu da sariarekin, eta berarekin batera Venezuelara joandakoei eskaini nahi izan die aitortza. Diskurtsoan zehar bere bizitza gidatu duten "hiru ardatz nagusi" azpimarratu ditu Ugaldek: "Euskal baserria, Inazio Loiolakoak eta Frantzisko Xabierrek helarazitako fedea, eta Venezuelarekin konpromisoa".
Euskal baserria, oinarrian
"Bizitzaren arlo guztietan maitatzen eta zerbitzatzen irakatsi zidaten. Duela 65 urte berriz ere jaio nintzen Venezuelan, egun gurutziltzatuta dagoen herrialde zoragarri horretan, eta giza eskubideen alde borrokan aritu naiz". Bere sustraiak "uneoro gogoan" dituela zehaztu du Ugaldek, eta aitortu du beti egongo dela estuki lotuta Bergarako Moiua dorretxera: "Familiaren biziraupena bermatzeko, kide guztien lanean oinarritu da euskal baserriaren ekonomia. Txiki-txikitatik jardun nuen bertan lanean, eta horrek erakutsi zidan amorerik ez ematen, zailtasunak lan eginda gainditzen lagundu dit".
Arriaran, Aita Mari ontzitik zuzenean
Aita Mariren izenean, Salvamento Marítimo Humanitario elkarteko kidea den Nerea Machadok oso hunkituta jaso du saria. Hala ere, ontzian bertan misioan dagoen Izaskun Arriaran aramaioarrak ekitaldian parte hartu du zuzenean, bideo dei bidez. Esker ona adierazi eta boluntario guztiei eskaini nahi izan die saria: "Gurekin lanean aritu diren guzti-guztientzat da sari hau. Boluntarioen lanik gabe ezingo genuke gure lan honekin jarraitu, baita babestu gaituzten guztiei eskertu. Giza eskubideen aldeko aldarria egin nahiko nuke, eta gogorarazi egun hauetan mediterraneoan ikusi ditugun egoerak ezin direla onartu ; heriotzak, desagerpenak...ezin dugu horrela jarraitu".
Basque Culinary Center, "berritzailea eta gaurkotua"
Basque Culinary Centerren izenean, Joxe Mª Aizega igo da oholtzara. Mondragon unibertsitatearen gastronomia fakultateak hamar urtean askotariko jarduerak eta eskaintza zabala garatzeko izan duen gaitasuna azpimarratu ditu Aizeagak: "Hasi ginenean ezin genuen sinetsi gure fakultatean gastronomian doktoretza egiteko aukera izango genuenik ere. Gastronomiaren digitalizazioa lantzeko laborategi bat ere jarri dugu martxan, eta baita ortu eskola bat ere. Identitate propio eta ezberdin bat garatzeko gai izan gara, ohiko entitate akademikoez harago". Gastronomia ikuspegi berritzaile eta gaurkotu batetik lantzen dutela zehaztu du, eta horrek bereizten dituela azaldu du Aizeagak.
