Azken lau egunetan 736 kasu baieztatu dira bailarako proba ofizialetan. Hala, pandemia hasi zenetik, 21.000 kasu baino gehiago atzeman ditu Osakidetzak Debagoienean; zehazki, 21.095. Hurrengo taulan daude azken zenbatekoak, egunez egun eta herriz herri:
| HERRIA | Eguena | Egubakoitza | Zapatua | Domeka | GUZTIRA |
| Arrasate | 75 | 57 | 50 | 33 | 215 |
| Bergara | 52 | 70 | 27 | 28 | 177 |
| Oñati | 28 | 25 | 44 | 16 | 113 |
| Aretxabaleta | 38 | 30 | 18 | 20 | 106 |
| Eskoriatza | 24 | 18 | 14 | 17 | 73 |
| Aramaio | 7 | 7 | 4 | 2 | 20 |
| Antzuola | 8 | 1 | 3 | 5 | 17 |
| Elgeta | 2 | 3 | 1 | 6 | 12 |
| Leintz Gatzaga | 1 | 2 | 0 | 0 | 2 |
| GUZTIRA | 235 | 213 | 161 | 127 | 736 |
Dagoeneko aste bat igaro da Jaurlaritzak koronabirus kasuak zenbatzeko modua aldatu zuenetik. Datu ofizialek egoera zaurgarrian dauden pertsonen eta gaixo-agiria behar dutenen positiboak zenbatzen ditu soilik; horiei egiten baitzaie proba Osakidetzan. Hala, positibo kopuruak behera egin dezakeela kontuan hartuta, pandemiaren bilakaera aztertzeko bestelako adierazleei ere erreparatu behar zaie.
EAEko erietxeetan, azken datuaren arabera, 143 lagun daude Zainketa Intentsiboetako Unitatean eta 780 plantan. Aurreko asteko datuekin alderatuta, lagun bat gutxiago dago ZIUn eta hamasei gutxiago plantan. Debagoieneko ospitalean ere, modu apalean bada ere, behera egin du okupazioak: hemezortzi positibo zeuden ingresatuta eguenean eta hamalau –eta kasu zalantzagarriak diren beste hiru– daude gaur.
Heriotzei dagokienez, erkidegoan 78 pertsona zendu dira gaitzaren eraginez; aurreko astean baino hemezortzi gehiago. Hala, guztira, 5.256 lagun hil dira EAEn pandemia hasi zenetik eta 6.586 Hego Euskal Herrian. Debagoieneko datuei dagokienez, Osasun Sailak ez ditu herrietako datuak argitaratzen urriaz geroztik; ordura arte 175 heriotza erregistratu ziren eskualdean.
Honako grafikoan daude EAEn erregistratu diren heriotzak, adin tartearen arabera:
