Gotzone Sagarduik astelehen eta asteartean egindako iragarpenen harira, protokolo neurri berriak dira indarrean. Gaixo agiria behar duten, sintomak dituzten edota talde zaurgarrietan dauden herritarrek soilik eskatu dezakete proba diagnostikoa egiteko hitzordua Osakidetzan. Ondorioz, herritar talde hauei dagozkien positiboen datuak biltzen ditu Osasun Sailak, eta zifra horietara mugatuko dira, gaurtik aitzin, Goienak pandemiaren inguruan eskainitako zenbakiak zein bilakaeraz egindako irakurketak.
1.011
Asteko lehen hiru egunetan Debagoienean atzemandako kasuek 1.000ko langa igaro dute. 300 positibotik gora hauteman dira egunero. Azken zazpi egunei erreparatuta, 1.997 herritar kutsatu dira.
| Herriak | Astelehena | Martitzena | Eguaztena | GUZTIRA |
| Arrasate | 132 | 104 | 90 | 326 |
| Bergara | 99 | 98 | 79 | 276 |
| Oñati | 60 | 55 | 43 | 158 |
| Aretxabaleta | 38 | 28 | 43 | 109 |
| Eskoriatza | 21 | 20 | 27 | 68 |
| Antzuola | 15 | 9 | 7 | 31 |
| Aramaio | 6 | 4 | 8 | 18 |
| Elgeta | 2 | 12 | 4 | 18 |
| Leintz Gatzaga | 1 | 6 | 0 | 7 |
| GUZTIRA | 374 | 336 | 301 | 1.011 |
- Grafiko eta datu guztiak ikusgai daude goiena.eus-eko azken datuak atalean.
Aldaketa gutxi ospitaleetan
Astelehenean argitaratutako datuekin alderatuta, aldaketa gutxi izan dira EAEko erietxeetako okupazio mailan. Uneotan, 807 herritar daude ospitaleratuta, azken eguneraketan baino 11 gehiago. Zainketa Intentsiboen Unitateei dagokionez, 121 eta 142 herritarren arteko mugan dabil zifra urtea hasi zenetik; uneotan, 136 dira zainketa berezia behar duten pertsonak. Bailarako datuei dagokionez, hamabost lagun daude koronabirusaren eraginez ingresatuta Debagoieneko Ospitalean, astelehenean baino hiru gutxiago.
