38 kasu berrirekin, 78 kutsatu daude uneotan bailarako adinekoen egoitzetan

Eskoriatzako Jose Arana egoitza, artxiboko irudi batean.

Gipuzkoako Foru Aldundiak argitaratutako datuen arabera, pasa den eguaztenetik 115 positibo berri hauteman dira probintziako adinekoen egoitzetan; horietatik 38 (%33), Iturbideko, Mizpirualdeko, Jose Aranako eta San Martingo egoitzetan. Orotara, 317 egoiliar daude kutsatuta Gipuzkoan, eta 78 dira bailarako egoitzetakoak.

Gizarteko datu orokorren bidetik, Gipuzkoako adinekoen egoitzetako kutsatze kopuruek ere goranzko joerari eusten diote. Hots, urtarrilaren 3an 135 kasu aktibo zeuden, 251 ziren kutsatuak joan zen eguenean, eta gaur, berriz, 317 egoiliarri atzeman zaie birusa. Urtea hasi zenetik, beraz, ia hirukoiztu egin da kutsatu kopurua.

Bailarako egoitzak dira gorakada horren adierazle. Bost zentrotan daude uneotan kutsatuak: 35 Arrasateko Iturbiden, 17 Oñatiko San Martinen, 14 Bergarako Mizpirualden, 10 Eskoriatzako Jose Aranan eta 2 Arrasateko Benito Mennin. Orotara, 78 egoiliar. 38, gainera, eguaztenetik gaur arte atzeman diren kasuak dira; zehazki, 13 positibo berri izan dira Iturbiden eta Mizpirualden, 10 Jose Aranan, eta 2, berriz, San Martinen.

Sendatu eta hildakoak

Txanponaren beste aldean, baina, sendatu eta hildakoen datuak daude. Azken lau egunetan 3 egoiliar hil dira Gipuzkoan, kutsatu guztien %0,9a. Gaitza pasa dutenei dagokionez, 46 egoiliar izendatu ditu Aldundiak sendatu gisa; horietatik 4 dira bailarako egoitzetakoak (2 Oñatiko San Martinen, eta bana Bergarako Mizpirualden eta Aretxabaletako Debagoiena egoitzan).

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.