Abenduan behera egin du langabezia tasak Debagoienean; azaroan -uda ostean lehen aldiz- gora egin eta gero, urteko azken hilean jaitsiera erregistratu da, berriz ere. Zehazki, 2.482 langabe zenbatu dituzte, aurreko hilean baino 43 gutxiago; eta langabezia tasa %8,08an kokatu da, azarokoarekin alderatuta 0,15 puntu behera eginda. Joera beheranzkoa izan da Aretxabaleta, Arrasate, Bergara, Eskoriatza, Leintz-Gatzaga eta Aramaion; alderantziz, gora egin du Antzuolan, Elgetan eta Oñatin.
Langabeziaren bilakaera ona izan da urtean zehar Debagoienean, %8,76ko tasarekin hasi eta %8,08koarekin amaitu delako; eta urte hasieran baino 206 langabe gutxiagorekin.
Azken bost urteetako bigarren abendu onena
Alderaketa aurreko urteekin eginda, urte amaieran erregistratutako bigarren daturik onena da, 2017tik: urte horretako abenduan %8,40ko langabezia tasa izan zen; 2018koan, %8,30ekoa; 2019koan, %7,86koa; eta 2020koan, %8,74koa. 2019a izan zen, beraz, urterik onena, eta 2020a txarrena: urtebeteko epean lan barik zeuden 272 pertsona gehiago zenbatu zituzten bailaran.
Hego Euskal Herrian ere hobera
Hego Euskal Herriari dagokionez, egoerak hobera egin du kasu horretan ere: abendu amaieran 146.871 lagun zeuden langabe gisa erregistratuta Lanbideren eta Nafar Lansareren bulegoetan; azaro bukaeran baino 2.610 gutxiago, eta iazko abenduan baino 23.006 gutxiago.
Idoia Mendiak, Eusko Jaurlaritzako Lan eta Enplegu sailburuak, abenduko enpleguari buruzko datuen balorazio positiboa egin du goizean: "Langabezia jaitsi egin da, lurralde guztietan; gizonen artean eta, batez ere, emakumeen artean; eta adin-tarte ia guztietan, batez ere gazteenetan".
Zenbakiek diote langabezia pandemiaren aurreko mailan dagoela, baina pertsona gehiago daude Gizarte Segurantzan kotizatzen, Mendiak azaldu duenez.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak