Azken asteetako bilakaerari segika, inoiz baino datu okerragoak erregistratu dira azken zazpi egunetan EAEn: 19.709 positibo atzeman dira erkidegoan, horietatik 1.456 bailaran. Azken lau egunei erreparatuta, goranzko joerak ez du etenik; 849 kasurekin abenduaren 13tik 19rako astea ordura arteko asterik makurrena izan bazen, azken lau egunetan bakarrik positibo gehiago atzeman dira (907). Horren adibide, asteartetik domekara 2020ko martxoaz geroztik positibo gehien atzeman diren sei egunak izan dira.
| Herriak | Eguena | Egubakoitza | Zapatua | Domeka | GUZTIRA |
| Arrasate | 84 | 62 | 53 | 85 | 284 |
| Oñati | 79 | 73 | 40 | 67 | 259 |
| Bergara | 32 | 56 | 41 | 16 | 145 |
| Aretxabaleta | 37 | 30 | 32 | 6 | 105 |
| Eskoriatza | 12 | 19 | 18 | 4 | 53 |
| Antzuola | 5 | 13 | 4 | 5 | 27 |
| Aramaio | 7 | 3 | 5 | 0 | 15 |
| Elgeta | 3 | 4 | 4 | 3 | 14 |
| Leintz Gatzaga | 3 | 0 | 2 | 0 | 5 |
| GUZTIRA | 262 | 260 | 199 | 186 | 907 |
- Grafiko eta datu guztiak ikusgai daude goiena.eus-eko azken datuak atalean.
736 puntu gehiago
Intzidentzia-tasaren igoerak ere ez du etenik. Astelehenean 3.000ko langatik gertu bazen, lau egunetan 700 puntutik gorako igoera izan du, eta 4.000tik gertuago dago uneotan (3.556,60). EAEko datu orokorrak ere lehen aldiz igaro du 2.000 puntuko muga (2.076,68); Gipuzkoan dago intzidentzia-tasa altuena, baina geroz eta gertuagotik jarraitzen diote Bizkaia eta Arabako datuek. Baiarako herrien artean, esanguratsua izaten jarraitzen du Oñatiren kasuak; 5.000 pertsonatik gorako herrien artean, erkidegoan tasa altuena duen udalerria da (6103,94).
30 hildako
Azken datuen eguneraketetan erietxeetako datuek aldaketa nabarmenik irudikatzen ez zuten arren, lau egunotan gora egin dute erregistroek. Uneotan, 381 herritar daude EAEko erietxeetan, domekan baino 96 gehiago. ZIUetan, berriz, 110 pertsona daude, duela lau egun baino 9 gehiago. Heriotzei dagokionez, 30 izan dira azken astean erkidegoan hil diren herritarrak, abenduaren 13tik 19rako astean baino 8 gutxiago.
Neurri murriztaile berriak
Eusko Jaurlaritza eta Nafarroako Gobernua neurri murriztaile berriak indarrean jartzeko elkarlanean ari dira. Maria Txibiteren gobernuak gaur bertan eskatuko dio baimena Nafarroako Justizia Auzitegi Nagusiari; Iñigo Urkulluk, aldiz, Babes Zibileko Planaren aholku batzordea (LABI) deitu du biharko, datozen egunetan indarrean sartuko liratekeen neurriak onartzeko.
Hainbat hedabidek jakitera eman dutenez, jarduera komertzial, sozial eta kultural guztiak 01:00rako amaitzea proposatuko du Jaurlaritzak; 21:00rako, berriz, abenduaren 31an zein urtarrilaren 1, 5 eta 6an. Oro har, toki itxietan edukiera %60ra murriztea da asmoa, eta estadio eta 5.000 ikusle baino gehiagoko espazioetan, berriz, %50era. Horrez gain, barran kontsumitzea eta mahai bakoitzean hamar lagun baino gehiago elkartzea debekatu nahi du Eusko Jaurlaritzak.
