Eguberrien bezperan, positiboen zaparradak ez du etenik

549 positibo hauteman dira asteko lehen hiru egunetan bailaran; 183 egunean, alegia. Intzidentzia-tasari dagokionez, 2.820,60an kokatu da, astelehenean baino 310 puntu gehiago. Pasa den asteko joerari eutsiz, aipagarria da Oñatiren kasua: azken zazpi egunetan herritarren %3,3a kutsatu da. Uneotan, 285 herritar daude EAEn ospitaleratuta; horietatik 101 ZIUetan.

Positiboen zaparradak ez du etenik. Atzo EAEn 24.832 proba egin ziren, eta horietatik 4.744ri birusa atzeman zitzaien (%19,1); 2020az geroztik, erkidegoan izan den daturik okerrena da. Bada, bailarako datuek bilakaera bera dute, martitzenean hauteman baitzen egun bakarrean inoiz erregistratutako positibo kopuru handiena, eta hiru eguneko datuek ere langa guztiak hautsi baitituzte. 549 kasu zenbatu dira astelehenetik eguaztenera Debagoienean, eta 1.029 azken 7 egunetan. Aurreko asteko joerari eutsiz, adierazgarria da Oñatiren kasua, pasa den eguaztenetik 357 oñatiar kutsatu baitira (herritar guztien %3,3a).

Herriak Astelehena Martitzena Eguaztena GUZTIRA
Oñati 36 83 58 177
Arrasate 48 50 61 159
Bergara 24 35 32 91
Aretxabaleta 11 15 29 55
Eskoriatza 8 13 12 33
Elgeta 3 4 4 11
Aramaio 3 3 4 10
Antzuola 4 2 3 9
Leintz Gatzaga 1 3 0 4
GUZTIRA 138 208 203 549
  • Grafiko eta datu guztiak ikusgai daude goiena.eus-eko azken datuak atalean.

3.000ko langara gerturatzen

EAEn intzidentzia-tasa 1.495,38an dago, eta lurraldeka, Gipuzkoak du handiena (1.824,26), Bizkaia (1.475,15) eta Arabaren (1.257,92) aurretik. Bailarako datuek, baina, ia bikoiztu egiten dituzte erkidegoko datu orokorrak; hots, 2.820,60an dago intzidentzia-tasa, eta hiru egunean 300 puntutik gora hazi da.

 

 

Joera egonkorra ospitaleetan

Positibo kopuruen gorakadak, baina, ez du aldaketa nabarmenik eragin EAEko ospitaleetan eta ZIUetan dauden herritar kopuruan. Duela astebete 299 pertsona zeuden ospitaleratuta, 324 domekan, eta atzo, berriz, 285. Zainketa Intentsiboetako Unitateetan antzekoa da joera; abenduaren 15ean 100 herritar zeuden, domekan 105, eta atzo, aldiz, 101.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.