Gotzone Sagardui Osasun sailburuak gaur goizean eman ditu jakitera 5 eta 11 urte arteko haurren txertaketa kanpainaren inguruko hainbat argibide. Pasa den astean Carolina Darias ministroak iragarri zuen abenduaren 13an adingabeei egokitutako 1,3 milioi dosi jasoko dituela Espainiak -beste 2,4 milioi urtarrileko lehen astean-. Bada, Sagarduik euskal irrati batean adierazi duenez, 60.000 dosi jasoko ditu Eusko Jaurlaritzak abenduaren 14an.
Hurrengo egunean bertan ekingo dio Jaurlaritzak haurrak ziztatzeari; abenduaren 15ean, eguaztenean. Datu gisa, 5 eta 11 urteko 136.000 herritar baino gehiago daude uneotan EAEn, eta lehen txanda honetan jasoko diren dosiei erreparatuta, adin-talde horretako haur erdiek baino gutxiagok izango dute txertatzeko aukera. 11 urtekoetatik hasi eta adinean behera joatea da Jaurlaritzaren asmoa, eta zortzi asteko epea aurreikusi dute ziztada eta ziztada artean.
Eskoletan ez
"Gabonetako oporrak tarteko eta, batez ere, gurasoekin joan beharko dutela kontutan hartuta, osasun zentroak eta erdibideko txerto guneak prestatuko ditu Osakidetzak", esan du sailburuak. Ondorioz, eskoletan ez da txertorik jarriko. Azkenik, eta oinarrizko bide orriak definitu dituen arren, haurren txertaketaren estrategia zehatza datozen egunetan jakitera emango duela adierazi du.
