Atzo arratsaldean Eusko Jaurlaritzak prentsa ohar bidez adierazi zuenez, EAEko Justizia Auzitegi Nagusiak Covid Ziurtagiri Digitalaren erabilera ezartzea baimendu ez zuen erabakiari helegitea jarri dio Espainiako Auzitegi Gorenean Iñigo Urkullu lehendakariaren gobernuak. "Neurriaren proportzionaltasuna" aipatu dute errekurtsoan, "eskubideen murrizketa orok beharrezkoa eta egokia izan behar baitu goragoko eskubide bat babesteko"; norbanakoen askatasun eskubidearen kaltetan, "goragoko" eskubide horien baitan kokatzen dituzte "bizitzeko eskubidea eta osasunaren babesa".
Eusko Jaurlaritzak argudiatu du ziurtagiria ezartzea "beharrezkoa" dela "birusaren transmisio komunitarioko olatu berri bat eteten laguntzeko eta herritar guztien txertaketa are gehiago sustatzeko". Neurriak "arrisku-portaerak" eragozteko eta kutsatzeak murrizteko helburua du gobernuaren hitzetan, eta "ondasun juridiko horrek askoz ere babes handiagoa izan behar du dokumentua establezimenduan sartzeko aurkezteak dakarren eragozpena baino".
Aplikazioa
Gotzone Sagardui Osasun sailburuak asteleheneko prentsaurrekoan iragarri zuenez, ziurtagiria 150etik gorako intzidentzia-tasa duten udalerrietako zenbait jardueratan eskatzea du helburu Eusko Jaurlaritzak; zehazki, 50 pertsonatik gorako jatetxeetan zein diskoteka, dantzaleku, musika taberna eta karaokeetan.
