Azaroko lehenengo astean egindako probek 71 kasu baieztatu zituzten eskualdean. Bigarrenean egindakoek, aldiz, 22 gehiago; guztira 93 positibo hauteman dira. Arrasaten eta Bergaran erregistratu dira positibo gehienak.
Azaroko bi asteen arteko alderaketa eginda, datu adierazgarria da Bergaran bederatzitik 28ra igo direla kasuak. Eta Antzuolan hiru gutxiago hauteman dira, baina halere hamalau izan dira bertan atzemandakoak.
Hurrengo taulan daude datuak egunez egun eta herriz herri:
| Herriak | Ast. | Mar. | Eguaz. | Egue. | Egub. | Zap. | Dom. | Guz. |
| Arrasate | 7 | 6 | 6 | 2 | 1 | 7 | 0 | 29 |
| Bergara | 4 | 5 | 2 | 8 | 2 | 7 | 0 | 28 |
| Antzuola | 0 | 1 | 1 | 2 | 6 | 4 | 0 | 14 |
| Oñati | 2 | 3 | 0 | 0 | 2 | 2 | 1 | 10 |
| Aretxabaleta | 1 | 1 | 4 | 1 | 0 | 0 | 0 | 7 |
| Eskoriatza | 1 | 0 | 0 | 0 | 0 | 2 | 0 | 3 |
| Elgeta | 0 | 0 | 0 | 1 | 0 | 0 | 1 | 2 |
| Aramaio | 0 | 0 | 0 | 0 | 0 | 0 | 0 | 0 |
| Leintz Gatzaga | 0 | 0 | 0 | 0 | 0 | 0 | 0 | 0 |
| GUZTIRA | 15 | 16 | 13 | 14 | 11 | 22 | 2 | 93 |
- Grafiko eta datu guztiak ikusgai daude goiena.eus-eko azken datuak atalean.
Bailarako intzidentziak, ia 100 puntu gehiago
Eskualdeko intzidentzia-tasa orokorra 160tik 253ra igo da astebetean. EAEkoaren gainetik dago (181ekoa da), baina beste aste batez, Gipuzkoakoaren azpitik (308koa da).
Herriei dagokienez, azpimarratzekoa da Elgeta eremu gorrira igaro dela, azken zazpi egunetan bi kasu berri baieztatu direlako bertan. Eta kolore aldaketa gehiago egon ez den arren, tasek gora egin dute; Bergaran adibidez, azken positiboen gorakadarekin bikoiztu egin da intzidentzia. Halere, Debagoieneko herri handiek ez dute 400eko langa gainditu, eta hortaz, momentura arte Osasun Sailak iragarritakoaren arabera, ez dute murrizketarik izango.
Datu guztiak daude ondorengo mapa interaktiboan:
Positiboek eta intzidentziak, gora EAEn
Zazpi egunetan 2.576 positibo erregistratu dira Euskal Autonomia Erkidegoan –azaroko lehenengo astean baino 1.152 gehiago–. Gauzak horrela, intzidentzia-tasak ere gora egin du eta 109tik 181era igo da. Aurreratu bezala, Gipuzkoak jarraitzen du gorakada handiena erregistratzen.
Bestetik, oinarrizko birsorkuntza datua ere hazi egin da: 1,22tik 1,36ra igo da. Hala, pandemiak hedatzen jarraitzen du. Hurrengo grafikoan ikus daiteke R0 datuaren bilakaera:
Heriotzak eta ZIUetako datuak egonkor
Heriotzei dagokienez, hilaren 1etik 7ra, hamar lagun zendu ziren EAEn eta 8tik 14ra sei hil dira. Pandemia hasi zenetik, guztira, 4.828 dira koronabirusaren eraginez hildakoak.
Eta erkidegoko ospitaleetan, aurreko astean baino lagun bat gehiago dago ZIUn ingresatuta (25). Nolanahi ere, plantako ospitaleratzeek gora egin dute eta 86tik 114ra igaro da ingresatuta daudenen kopurua. Duela hilabete, urriaren 15ean, 21 lagun zeuden ZIUn eta 72 plantan.
