Joan den asteleheneko datuetan oinarrituta, Agurain, Abadiño, Astigarraga, Azpeitia eta Zumarraga dira gaur-gaurkoz eremu gorrian dauden herriak EAEn. Bihar, hilak 15, argitaratuko dira datu eguneratuak, eta 400eko intzidentzia metatua baino gehiago duten herrietan murrizketak aplikatuko ditu Jaurlaritzak: "Euskadiko kutsatzeek goranzko joera hartu dute eta lehenbailehen geldiarazteko beharra dago".
Hori horrela, Gotzone Sagarduik prentsaurrekoa emango du asteartean Gobernu Kontseiluaren ostean, jarraibide eta murrizketa berrien inguruko informazioa emateko.
Osasun Sailak prebentzio-neurriak betetzeko beharra azpimarratu du; hala nola, pilaketak saihestea, eskuen higienea areagotzea, espazio itxiak aireztatzea, maskara erabiltzea eta txertoa jaso ez dutenek jasotzea.
Nafarroako Foru Erkidegoa ere alerta egoeran dago. Atzo, adibidez, 159 kasu berri atzeman zituzten, azken hiru hilabeteetako kopururik altuena, eta bezperan 132.
