Gotzone Sagardui Osasun sailburuak txertaketari dagozkion hainbat gairen inguruan jardun du gaur. Alde batetik, Ipar Euskal Herrira txertatzera joan diren hegoaldeko herritarren hautuarekin "harrituta" agertu da sailburua, eta adierazi du, oraingoz behintzat, Osasun Sailak ezin dituela gai horri dagozkion zalantzak argitu; izan ere, ez omen dute informaziorik jaso Frantziako Gobernuaren aldetik. "Zalantza asko daude jendartean eta guk ezin dugu erantzun. Ez dakigu, adibidez, nola jakinaraziko den iparraldean hartutako txertoa EAEko herritarren osasun historialean". Halere, Sailburuak esan du "errespetagarria" dela herritar horien hautua.
Bestetik, oporraldian txertoa hartzea tokatzen zaienei ere mezua helarazi nahi izan die sailburuak: "Lehentasuna txertoari eman behar zaio, immunitate handiena lortzeko". Izan ere, bigarren dosiari ezetz esaten diotenek "beranduago" hartuko dute txertoa, baina immunitateari dagokionez, eraginkortasuna gal daiteke. "Gauza jakina da, adibidez Pfizerren kasuan, lehenengoa jaso eta 21 egunetara jarri behar dela bigarrena. Epe horiei uko eginez gero, immunitate-maila ez da berdina izango", argitu du.
Eta aurrekoari jarraituz, datorren Osasun Batzordean, erkidegoek berriz izango dute mahai gainean norberaren erkidegoa ez den baten txertoa hartzeko aukera. Orain arte, Jaurlaritza ez da aukera horren alde agertu, baina Sagarduik azaldu du egoera desberdina dela erkidego batetik bestera "lekualdatutakoen" kasuan; hau da, hilabete bat baino gehiago beste erkidego batean igaro behar dutenen kasuan: "Arrazoia edozein dela ere, hilabete bat baino gehiago beste erkidego batean igaro behar izanez gero, txertoa hartzeko txanda eska daiteke bertan. Hori horrela egiten ari gara erkidego guztietan".
Bukatzeko, nerabeen txertaketari lotuta, Osasun sailburuak ez du datu zehatzik eman. Osasun Sailaren nahia ikasturtea hasi orduko nerabeak txertatzea da, baina aukera hori iristen den txerto kopuruaren araberakoa dela esan du Sagarduik: "Momentu honetan Pfizerrek soilik du adin tarte hori txertatzeko baimena, eta hortaz, iristen diren zenbatekoen araberakoa izango da gazteen txertaketaren erritmoa".
Txertaketaren bilakaera, EAEn
Txertoen konpainiei erreparatuta, Pfizerren 1.285.073 txerto jarri dira, AstraZenecaren 284.394, Modernaren 194.496 eta Janssenen 69.899. Hala, Osasun Sailak jakinarazi duenez, 16 urtetik gorako herritarren % 62,1ek jaso du dosi bat gutxienez eta EAEko biztanleen %41,7k bukatu du bere txertaketa prozesua. Bestetik, orain arteko datuek erakusten dutenez, %1,6 izan dira txertoa jarri ez dutenak (kontraindikazioengatik edo uko egin diotelako).
Honako taula honetan daude txertaketaren datuak:
| Adin-taldea | 1. dosia | Inmunizazio handiena |
| 100 edo gehiago | % 100 | % 99,1 |
| 90 - 99 | % 100 | % 99,8 |
| 80 - 89 | % 100 | % 99,5 |
| 70 - 79 | % 97,4 | % 96,8 |
| 60 - 69 | % 94,0 | % 36,8 |
| 50 - 59 | % 89,0 |
% 58,2 |
| 40 - 49 | % 47,8 |
% 18,5 |
| 30- 39 | % 15,2 |
% 13,0 |
| 20 - 29 | % 14,5 |
% 11,8 |
| 16 - 19 | % 3,4 |
% 2,0 |
