Biziberri planari –edo Jaurlaritzak diseinatutako bide-orriari– jarraituz, EAE bigarren agertokira igaro da aste honetan; martitzenean, zehatzago esateko. Intzidentzia-tasa 150etik jaitsi zen eta kutsatzeek beheranzko joera argia erakutsi dute.
Atzo bertan Osasun Sailburuak adierazi zuen "beherakada baieztatu arte" ez dutela neurririk malgutu nahi, baina hain zuzen ere hori da bihar, egubakoitza, osasun agintariek aztertuko dutena.
Bigarren agertokian, hainbat aldaketa
Honako neurriak har daitezke planaren bigarren agertokian egonda: jarduerak eteteko eta establezimenduak ixteko ordutegia 00:00etatik 01:00etara luzatzea; merkataritzan, azoketan, azoka txikietan, kanpoko kultura-ekitaldietan eta kultu-aretoetan edukiera handitzea; ekitaldietan, gehienezko edukiera 600ekoa izatea barnealdean eta 800ekoa kanpoan; ostalaritzan mahai bakoitzeko sei pertsona egotea; txokoak eta elkarte gastronomikoak irekitzea, ordutegi-, edukiera- eta distantzia-mugekin; barruko esparruetan kirol-jarduera ahalbidetzea, gehienez hamar pertsonako taldeetan; kirol-ekitaldietan publikoa baimentzea: % 60ko edukierarekin, eta gehienez ere 800 pertsonako edukierarekin barnealdean eta 1.200 pertsonako edukierarekin kanpoan; bisita gidatuen, natura-turismoaren, aisialdi-zentro turistikoen eta abarren kanpoko jarduerak antolatzeko pertsona-taldeak handitzeko aukera ematea; eta edukiera % 60ra handitzea igerilekuen, lorategien, hoteletako terrazen eta kanpinen kanpoaldeetan.
