Osasun Publikoaren Batzordeak (Osasun Ministerioko ordezkariek eta autonomia erkidegoetako osasun agintariek) erabaki duenez, 40 eta 49 urte arteko herritarrak txertatzeko Janssen profilaxi monodosia erabiliko da. Azaldu dutenez, 70. hamarkadan jaiotakoak (zehazki, 1972 eta 1981 artean jaiotakoak) asko dira gainerako belaunaldietakoekin alderatuta, eta hortaz, dosi bakarraren abantaila baliatu nahi dute txertaketaren erritmoa bizitzeko.
Nolanahi ere, adin-tarte horietako herritarren txertaketan Pfizer edo Moderna txertoak ere emango dira. Gainera, Gotzone Sagarduik adierazi duenez, aste honetan "txerto kopuru handia" jasotzea espero da. "Iristekoak dira 127.530 Pfizer etxekoak, 61.700 AstraZeneca etxekoak, 14.400 Moderna etxekoak eta 15.600 Janssen etxekoak", zehaztu du. Baina, aurreikuspenen arabera, horiekin 50 eta 59 urte bitarteko pertsonei lehen dosiak ematen jarraituko du Osakidetzak eta baita gainerako koletiboei bigarren dosiak ematen ere.
