Agerraldian norbanako bezala izena emateko aukerak irekita jarraitzen duela gogorarazi dute, eta, bereziki, belarriprest izan ala ez zalantzan dauden herritarrei luzatu diete proposamena: "Momentuz aktibatu diren herritarren gehiengoak ahobizi izatea erabaki du, eta ariketa egiteko bi rolak dira beharrezkoak". Gehitu dute belarriprest rolak norberaren zein ingurukoen hizkuntza-ohiturak aldatzen laguntzen duela, euskaraz gehiagotan egiteaz gain, ingurukoei hala aritzeko gonbidapena egiten dielako.
Bestetik, azaldu dute COVID-19aren pandemiak Euskaraldian ere eragina duela. Zehazki, esan dute eguneroko harremanetan "hizkuntza inertziak astintzea" eta "euskararen erabilera areagotzea" dela ariketaren helburua, baina pandemiak harreman horiek mugatzen dituela. "Kalean presentzia gutxiago izango dugun arren, hurbileko harreman sareetan hizkuntza-ohiturak aldatzea posible da, eta Euskaraldia egin egingo da", azpimarratu du Arrate Illaro Euskaraldiaren koordinatzaileak.
Illarok esandakoaren bidetik, (harremanak, kaleko ekintzak eta ekitaldiak mugatuta egongo direla-eta) beste formula batzuk ere aurkeztu dituzte ariketa soziala bistaratzeko. Alde batetik, lehen edizioan bezala, belarriprest eta ahobiziek rola adierazten duen txapa erabiliko dute. Bestetik, ariguneak identifikatuko dira euskarri fisikoak erabilita, eta horrez gein, leiho, balkoi eta erakusleihoetan Euskaraldiko ikurrak eta banderak jartzeko proposamena ere egin dute.
Izena emateko hiru modu
Ahobizi edo belarriprest izateko, Euskaraldiko webgunean eman daiteke izena, baina baita herrietako batzordeak antolatzen ari diren informazio eta izen-emate guneetan ere. Gainera, horiez gain, aukera dago telefono mugikorretarako sortu den aplikazioa erabiltzeko.
