Datuak herrika aztertuta, Debagoieneko herri guztietan egin zuen behera langabe kopuruak urrian. Langabezia tasari dagokionez, Aramaio da une honetan txikiena duena: %2,12. Beste muturrean aldiz, Arrasate dago, %12,85ekin.
| Langabeak urrian | Langabeak irailarekin alderatuta | Langabezia tasa | |
| Antzuola | 74 | -9 | % 6,66 |
| Aramaio | 16 | -3 | % 2,12 |
| Aretxabaleta | 274 | -32 | % 7,95 |
| Arrasate | 1.341 | -101 | % 12,85 |
| Bergara | 596 | -104 | % 8,25 |
| Elgeta | 41 | -4 | % 7,11 |
| Eskoriatza | 161 | -35 | % 7,93 |
| Leintz Gatzaga | 8 | -1 | % 5,80 |
| Oñati | 424 | -59 | % 7,80 |
| Debagoiena | 2.934 | -348 | % 9,41 |
EAEn behera eta Nafarroan gora
Hego Euskal Herriko datuei erreparatuta bestalde, lurraldeen arabera langabeziak bilakaera ezberdina izan zuen joan den hilabetean: Euskal Autonomia Erkidegoko hiru lurraldeetan behera egin zuen, Nafarroan aldiz, gora.
Hala, Euskal Autonomia Erkidegoan 6.287 langabe gutxiagorekin amaitu zen urria, eta gizarte segurantzan 12.421 afiliatu gehiagorekin. Une honetan 138.471 pertsona daude lan barik.
Eusko Jaurlaritzako Enplegu sailburuorde Elena Perez Barredok gaur egin duen agerraldian azaldu du urriko datuak itxaropentsuak direla, bere esanetan erakusten dutelako jarduera ekonomikoari berriro ekiten zaionean enplegua azkar suspertzen dela. Dena den, gaineratu du lan merkatuaren egiturazko akatsak mantendu egiten direla.
Nafarroan, bestalde, langabeziak gora egin zuen urrian: hilabete bukaeran, hasieran baino 763 langabe gehiago zeuden bertan. Guztira 38.908 pertsona daude lanik barik Nafarroan.