Eusko Jaurlaritzako Gotzone Sagardui Osasun sailburuak arratsaldean egindako agerraldian eman ditu jakitera alarma-egoeraren baitako neurri berriak. Azaldu duenez, EAEko herritarrek ezingo dute udalerritik atera, baina "udalerri mugakideetara" mugitzeko aukera izango dute, "jarduera sozioekonomikoetarako soilik".
Eremu publiko zein pribatuetako bilerak ere mugatu ditu Jaurlaritzak. Gehienez ere sei pertsonako topaketak egin ahal izango dira, eta "elkarrekin bizi diren pertsonak" izango dira salbuespen bakarra.
Bestalde, etxeratze-agindua 23:00etatik 6:00etara artekoa izango da EAEn. "Horrek esan gura du ordu horien artean herritarrek ezingo dutela kalean ibili", zehaztu du Sagarduik. Edozelan ere, salbuespen batzuk ere ezarri ditu. Etxetik ateratzeko aukera egongo da besteak beste, botikak erosteko, erietxera joateko, lanera joateko, ikasteko eta zaintzarako –adingabeak, adineko pertsonak edota mendekotasuna dutenei dagokienez–. Etxeratze-aginduak irauten duen orduetan, gainera, ez da garraio publikorik egongo.
Neurriak biharko 6:00etatik indarrean
Egoera epidemologikoaren bilakaeraren ondorioz eta "kutsatzeen hedapenari eusteko" hartu dituzte neurriok, sailburuak azaldu moduan. Horretaz gain, adierazi du dekretua "gaur bertan" argitaratuko dutela EAEko Aldizkari Ofizialean. Hori horrela, bihar goizeko 6:00etan sartuko dira indarrean iragarritako neurriak. Gaineratu du hamabost eguneko iraupena izango dutela horiek, egunez egun egoera "aztertzen" joango diren arren. "Arduratzeko moduko egoera da honakoa", azpimarratu du.
Gogoratu behar da atzo alarma egoera onartu zuela Espainiako Gobernuak –eta atzo bertan sartu zen indarrean–, eta etxeratze-agindua ezarri zuen 23:00etatik 6:00etara. Pedro Sanchez Espainiako presidenteak erkidego bakoitzaren esku utzi zuen etxeratzeko ordua ordubete aurreratu edo atzeratzea. Eusko Jaurlaritzak, baina, bere horretan mantendu du tarte hori.
Gaur goizean presidente autonomikoen bileran parte hartu du Iñigo Urkullu lehendakariak, eta bileran izan dira Europar Batzordeko ordezkariak ere. Arratsaldean, Euskadiko Babes Zibileko Planeko Aholku Batzordearen (LABI) bilera egin dute. Horren ostean iragarri dituzte bihartik aurrera indarrean jarriko dituzten neurriak.
