Birusaren hedapenaren goranzko joera ikusirik, Eusko jaurlaritzak neurri berriak ezarriko ditu. "Biziberri II planaren laugarren agertokian gaude, transmisio handikoan, eta hori geldiarazteko neurriak beharrezkoak dira", azaldu du Sagarduik. Gipuzkoa bizitzen dabilen hazkundea da une honetan agintariak gehien kezkatzen dituena.
Izan ere, EAEko intzidentzia tasa metatua 334,81 kasukoa da 100.000 biztanleko eta birsorkuntza tasa %1 baino altuagoa. Osasun sistemaren une honetako egoeraz azaldu du, 51 lagun daudela Zaintza Intentsiboko Unitateetan, guztira EAEk 620 plaza dituenean.
Neurri berriak
Esandako moduan, sei lagunera mugatuko dira biltzarrak eta %50era mugatuko da edukiera tabernetan –terrazetan salbu–, zein kultur eta erlijio ekintzetan. Txoko eta elkarteak itxita egongo dira eta ezin izango da federatu bariko kirolik egin. Gainera, itxi egingo dituzte parkeak gaueko 23:00etan, litroak egitea saihesteko. Tabernek eta jatetxeek 00:00etan itxi beharko dute. Neurri handiko ekintzei dagokienean, 400 pertsona elkartu ahalko dira gehienez barruan; 600 lagun, kanpoan direnean.
Jaurlaritzak oraingoz ez du konfinamendurik aurreikusten, baina ez dute baztertu. Neurriak indarrean jarriko dira datozen egunetan, EAEko Aldizkari Ofizialean argitaratu eta EAEko Auzitegi Nagusiak berretsi ondoren.
Test antigenikoak erabiltzen hasiko da Osakidetza
Osakidetza, bestetik, gaur hasi da COVID-19a atzemateko test antigenikoak erabiltzen. Pixkanaka, EAEko osasun-zentro guztietan egingo dituzte proba horiek, gaitza "berehala" atzeman eta kutsatze-katea lehenbailehen eteteko. Irekia atarian egunero argitaratzen duten txostenean jasoko dituzte test antigenikoen emaitzak, PCR probekin batera.
Berrogeialdia 10 egunekoa
Bestetik, positiboen bakartzea 10 egunekoa izango da hemendik aurrera eta baita positiboen kontaktuena ere. Orain arte, 14 egunekoa zen.
