Eskualde bakoitzean abiatuko den proiektuak bere berezitasun sozioekonomikoak kontuan izango dituela adierazi du Aldundiak, eta Debagoienaren kasuan, krisiaren aurkako eta lehiakortasunari lotutako hainbat jarduera egingo direla. Hala, tokiko garapenerako eskualde-agentziak –tokiko erakundeak, mankomunitateak eta eskualdean garapen agentziarik ez duten Gipuzkoako udalak– izango dira onuradunak, eta "suspertzea" bultzatzen duten prozesuak eta dinamikak lehenetsi beharko dituzte.
Aldundiak azaldu duenez, programarekin "eskualde mailako estrategiak, gaitasunak eta dinamikak bultzatzea" da helburua, eremu sozioekonomikoa berraktibatzeko: "Jarduera ekonomikoa, enplegua, gaitasun lehiakorra eta eskualdeen kohesio soziala mantentzea eta indartzea, inoiz baino premiazkoagoa den erronka da, pandemiak eragindako krisiaren aurrean".
