Uztaileko datuen arabera, 74 pertsona gehiago daude langabezian bailaran

Abuztua hastearekin batera uztaileko langabezia datuak eman dituzte jakitera (alarma egoerarik gabeko lehen hilabetea). Debagoienean %10,54ko langabezia tasa erregistratu da eta bailaran guztira, 3.282 herritar daude lanik gabe; uztailean baino 74 pertsona gehiago, alegia. Hego Euskal Herrian behera egin du langabeziak eta 1.504 langabe gutxiago daude.

Eman dituzte jakitera uztaileko langabezia datuak eta Debagoienean, ekainean baino 74 langabe gehiago zenbatu dituzte. Hala, langabezia tasa %10,29tik %10,54ra igo da eta guztira, bailaran 3.282 dira lanik gabe dauden herritarrak. Zehazki 0,25 puntu egin du gora langabeziak Debagoienean.

Bailarako herri gehienetan gora egin du langabezia tasak;  Antzuolan eta Leintz-Gatzagan, ordea, mantendu egin dira. Aramaion, berriz, zertxobait behera egin du eta langile bat gutxiago dago langabezian.

Uztaileko datuak herriz herri

  • Antzuola: 68 langabe (%6,12ko langabezia tasa)
  • Aretxabaleta: 302 langabe (%8,79ko langabezia tasa)
  • Arrasate: 1,458 langabe (%13,97ko langabezia tasa)
  • Bergara: 687 langabe (%9,51ko langabezia tasa)
  • Elgeta: 58 langabe (%10,05ko langabezia tasa)
  • Eskoriatza: 209 langabe (%10,29ko langabezia tasa)
  • Leintz Gatzaga: 7 langabe (%5,07ko langabezia tasa)
  • Oñati: 474 langabe (%8,72ko langabezia tasa)
  • Aramaio: 19 langabe (%2,51ko langabezia tasa)

Hego Euskal Herriko datuak

EAEko hiru lurraldeetan jaitsi egin da langabezia uztailean. Gipuzkoan % 0,19 (-75 langabe); % 1,03 Bizkaian (-834 pertsona); eta Araban, jaitsiera % 0,74koa izan da (-179 pertsona). Hala, 24.164 langabe daude Araban, 80.133 Bizkaian eta 39.063 Gipuzkoan. Guztira, 143.300 langabe pasatxo daude.

Nafarroari dagokionez, lan-bulego publikoetan 416 langabe gutxiago zenbatu dituzte uztailean, hau da, % 1,03 gutxiago aurreko hilabetearekin alderatuta, eta guztira 40.048 langabe daude. Guztira, Hego Euskal Herrian 1.504 langabe gutxiago daude uztaileko datuen arabera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.