Bergaran sei lagunek eman dute positibo PCR frogetan azken ordutan. Gaur, bihar eta etzi, haien gertukoei egingo dizkiete froga horiek. "Osasun saila ikertzen ari da orain Bergarako positibo hauek Gipuzkoako beste herri batzuetan agertu diren fokoekin lotura duten edo herrian sortu den brote berri baten bat den", adierazi du alkateak, Gorka Artolak. Artolak eskatu du babes neurriak inoiz baino zorrotzago betetzeko eta osasun agintarien irizpideak jarraitzeko. Hemen Bergarako alkateak herritarrei bidalitako mezua.
Aretxabeletan, berriz, herritar batek positibo eman du eta haren gertukoak etxean daude PCR frogak egiteko zain. Herriko plazan dagoen Paulaner taberna itxi egin dute tabernako jabeak hala erabakita, positibo eman duen herritar hori gertuko bezeroa delako.
Nekane Murga osasun sailburuak eguerdian emandako datuen arabera, kasu positiboak gora egin dute EAEn: atzo gauean 115 kasu berri zituzten zenbatuta: 63 Gipuzkoan, 43 Bizkaian eta 9 Araban. Joan den zapatutik atzo, egubakoitza, arte 25.000 PCR froga baino gehiago egin ditu Osakidetzak, horietatik ia 5.000, atzo.
