Bigarren edizioa
Prentsaurrekoan adierazi bezala, Euskaraldiaren bigarren edizio honen berrikuntza nagusia ariguneena da, alegia, era guztietako erakunde, enpresa eta elkarteetan sortzen diren euskara erabiltzeko gune babestuena. Lehen edizioaren ardatza hiztunen arteko harremana izan zen eta horri, talde babestuetan egiten den ariketa gehituko zaio.
Agerraldian gainera, Euskal Herri osoko elkarte, enpresa, komertzio, erakunde zein entitateei deia egin zaie bigarren edizio honetan parte har dezaten. Horrekin batera, jakinarazi dute, dagoeneko ehunka zentrotan milaka arigune sortu direla.
Gauzak horrela, Donostian egin den prentsaurrekoan dagoeneko ariguneak osatzen hasi diren hiru erakundeetako ordezkariak zein Euskaraldiaren antolatzaile eta koordinatzaileak izan dira, Leire Okarantza Fagor Taldeko gestio sozialeko arduraduna, esate baterako.
Euskaraldiaren bigarren edizio honi esker gainera, enpresa batzuek aurretik lantzen ari diren ibilbideari jarraipena emateko aukera izango dute eta beste erakunde batzuek, euskararen erabilera bultzatzeko espazio berriak sortzea eta babesteko aukera izango dute.
Fagor taldea
Leire Okarantza, Fagor Taldeko gestio sozialeko arduradunak hitza hartu du agerraldian eta Fagorren 5.000 langiletatik %80k baino gehiagok euskararen ulermena bermatua duela azpimarratu du eta Euskaraldiaren bigarren ediziorako "ilusioz" daudela ere aitortu du.
