Nekane Murga Osasun sailburuak gaurko agerraldian azaldu du azken orduetan beste 4 pertsona hil direla koronabirusaren ondorioz. Egindako probei dagokienez, 7.963 egin zituzten atzo –4.637 PCR eta 3.326 test azkar–. Egin ziren PCR probek 16 positibo egiaztatu zituzten; horietatik bat Araban eta 13 Bizkaian –Gipuzkoan bat ere ez–. Gainontzeko bi positiboak EAEn atzeman ziren, baina kutsatutako pertsonak beste autonomia-erkidegoko batzuetan bizi dira.
Koronabirusaren krisia hasi zenetik 1.459 pertsona hil dira guztira EAEn, eta 50 pertsonek jarraitzen dute ZIUetan ingresatuta.
Mugikortasuna, "erantzukizunez"
Osasun sailburuak adierazi duenez, pandemiaren bilakaera epidemikoa "hobea" da eta, beraz, euskal herritarrek lurraldean zehar mugikortasuna berreskuratu ahal izango dute astelehenetik aurrera. Sailburuak berretsi du pandemia ez dela "amaitu", eta "norbanakoaren erantzukizuna" eskatu du, egindako ahalegina gal ez dadin.
Zerra hortzak gorabehera, bilakaera "argia" dela esan du Murgak, eta arrazoi horregatik jo du Jaurlaritzak egokitzat egoitza finkatuta dagoen lurralde historikoaren barruan herritarren mugikortasun "arduratsua" eta "progresiboa" berreskuratzea. Lurralde historiko desberdinetako udalerri mugakideen kasuan, mugikortasunak irekita jarraituko du.
