Koronabirusaren krisia hasi zenetik, Debagoienean 338 pertsonak eman dute positibo COVID-19an. Arrasaten aurkitu dituzte kasu gehien, 204 dagoeneko; distantzia handira, euren artean nahiko jarraian daude Oñati, 41 kutsaturekin; Bergara 38rekin; eta Aretxabaleta 35ekin. Ostean, Eskoriatza dator, baieztatutako hamabi kasurekin; Antzuola laurekin; eta Aramaio eta Elgeta birekin. Leintz Gatzagan ez dago egiaztatutako kasurik.
>Grafiko guztiak modu interaktiboan ikusi hemen.
Datuak herriz herri
Kutsatze-tasa 100.000 biztanleko (2018ko INEren biztanleria datuetan oinarrituta):
| Herria | Positiboak | 100.000 biztanleko kutsatze-tasa |
| Arrasate | 204 | 926,47 |
| Oñati | 41 | 361,71 |
| Bergara | 38 | 260,35 |
| Aretxabaleta | 35 | 500,93 |
| Eskoriatza | 12 | 293,61 |
| Antzuola | 4 | 187,27 |
| Aramaio | 2 | 134,86 |
| Elgeta | 2 | 176,21 |
| Leintz Gatzaga | 0 | 0,00 |
Hego Euskal Herriko datuak
492 gaixo berri daude Hego Euskal Herrian; aurreko egunean 341 izan ziren. Positibo berrien banaketa lurraldeen arabera honakoa da: Araban 43, Bizkaian 311, Gipuzkoan 43 eta Nafarroan 95. Gainera, azken orduetan beste 51 pertsona hil dira koronabirusaren eraginez, aurreko eguneko datuaren bikoitza. Datu metatuei dagokienez, dagoeneko 18.430 lagun kutsatu ditu COVID-19 gaitzak Hego Euskal herrian eta 1.576 hil ditu.
Errekuperatuak bestalde, 614 izan dira azken orduetan eta honenbestez, ospitaleko alta jaso edo osatu direnak, guztira 9.581 dira Hego Euskal Herrian.
Bestalde, EAEko ospitaletan 838 paziente daude COVID-19 gaitzarekin ingresatuta eta egoera "hobetzen" ari dela esan du Nekane Murga Osasun sailburuak. Horren adierazle moduan jarri du sailburuak Debagoieneko Ospitalea: "Une honetan Arrasateko ospitalean ez dago koronabirusa duen pazienterik". Azkenik, egindako test kopuruari dagokionez, EAEn 4.339 PCR eta 3.050 test azkar egin zituzten. Positiboen ehunekoa, egindako probei dagokienez, % 8 da.
