Beste bi kasu Arrasaten, eta gainontzeko herrietan aldaketa barik

Positiboen datu metatuak Debagoienean (Grafikoa: Tokikom)

768 test egin dituzte azken orduetan EAEn eta horietatik 206k eman dute positibo. Debagoienean, domekan ezagutzera eman ziren datuetan igoera handia egon ostean –22 kutsatu 24 orduan–, azken bi egunetan kasu gutxi atzeman dituzte; atzo hiru eta gaur bi. Honenbestez, guztira, 200 pertsonak harrapatu dute COVID-19 gaitza ibarrean, eta horietatik 114 Arrasaten daude.

EAEko udalerriekin alderatuta, Arrasate 13. postuan dago gaixo kopuruaren arabera. Bestalde, 100.000 biztanleko kutsatze-tasa 517,73 da Arrasaten. Debagoienean bigarren kutsatze-tasa altuena duen Aretxabaletatik –329,18– oso urruti. Hala ere, kutsatze-tasa altuena duten udalerrietatik nahiko urruti dago oraindik Arrasate, ondorengo EAEko mapan ikus daitekeen moduan.

Iturria: Eusko Jaurlaritzako Osasun Saila.

Herria Positiboak 100.000 biztanleko tasa
Arrasate 114 517,73 (1. postua)
Oñati 27 238,20 (3. postua)
Bergara 24 164,43 (5. postua)
Aretxabaleta 23 329,18 (2. postua)
Eskoriatza 7 171,27 (4. postua)
Antzuola 2 93,63 (7. postua)
Aramaio 2 134,86 (6. postua)
Elgeta 1 88,11 (8. postua)
Leintz Gatzaga 0 0,00 (9. postua)

Kutsatze-tasa 100.000 biztanleko. 2018ko INEren biztanleria datuetan oinarrituta.

Hego Euskal Herria

Hego Euskal Herriko datuei dagokienez, 330 gaixo baieztatu dituzte azken orduetan. Kasu gehien Nafarroan atzeman dituzte; 124 zehazki. Bizkaian, 109 positibo berri identifikatu dituzte, Araban 66 eta Gipuzkoan 31. Gainera, 53 pertsona hil dira azken orduetan; 38 EAEn eta 15 Nafarroan.

Honenbestez, koronabirusaren krisia hasi zenetik 12.376 kasu baieztatu dituzte Hego Euskal Herrian, 788 dira dagoeneko hildakoak eta 4.149 osatutakoak edo ospitalean alta emandakoak.

Hego Euskal Herriko datu metatuak. (Grafikoa: Tokikom)

>Grafiko guztiak modu interaktiboan ikusi hemen.

EAEko ospitaletako datuei dagokienez, 1.725 lagun daude ospitalean eta 89 alta egon dira azken orduetan. Arrasaten 21 lagun daude ingresatuta eta ez da alta berririk egon. Horretaz gain, Nekane Murga Eusko Jaurlaritzako Osasun sailburuak azaldu duenez, etxeko ospitalizazioan dauden 466 pazienteri egiten zaiela jarraipena; 270 Bizkaian, 100 Araban eta 90 Gipuzkoan. Gainera, COVID-19aren antzerako sintomak dituzten 2.000 pertsona baino gehiago erreferentziazko zentroen bidez artatzen dituzte, telefonoz zein aurrez aurreko bisiten bidez, kasuaren arabera.

Oharra: EAEko kasu berriei dagokienez, Eusko Jaurlaritzak Espainiako Ministerioari helarazitako datuak eta Irekian partekatzen duen buletin ofizialeko datu zehatzak ez datoz bat. Albiste honetan jakitera ematen diren datuak, Jaurlaritzaren eguneko buletin ofizialean oinarrituta daude.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.