Pandemiaren ondorio sozioekonomikoak arintzea helburu duten neurrien berri eman du Maddalen Iriartek: "Langabezian geratu diren edota aldi baterako enplegu erregulazioetan sartu diren milaka langile egoera guztiz prekarioan geratu dira, baina babes sistema publikotik kanpo daude, dirulaguntzak jasotzeko baldintzak oso zorrotzak direlako; horregatik, sisteman sartzeko baldintzak malgutzea proposatzen dugu, pertsona horiek laguntza jasotzeko eskubidea izan dezaten eta krisiaren ondorio ekonomikoak ahalik eta txikienak izan daitezen".
Hiru neurri
Enpresa txikiek eta autonomoek izan dituzten galerak konpentsatzeko neurriak proposatu dituzte, besteak beste: zerga moratoria ordainketa horiek atzeratzeko, gastu finkoak (ura, elektrizitatea…) ezabatzea larrialdiak iraun bitartean eta konpentsatzeko funts bat sortzea kalte ekonomikoak arintzeko.
Osasun sistemari ere erreparatu dio EH Bilduk. Eta Iriartek adierazi du garrantzitsua dela test masiboak egitea, Osakidetzako langile guztiei babes-materiala (EPI) bermatzea eta "planifikazio oso bat egitea", alarma egoeraren osteko agertokia prestatzeko.
Adinekoen egoitza-zentroak ere gogoan izan ditu EH Bilduko bozeramaileak, "egoera benetan larria delako oro har". Eta eskatu du test masiboak egitea langileei zein erabiltzaileei eta babes ekipoak (EPIak) bermatzea, lantaldeak indartzea, eta "bete beharreko baldintzak betetzen ez diren kasuetan, Administrazioak erresidentzia pribatuen kontrola bere gain hartzea".
Alderdi eta eragileen mahaia
Auzolanaren garrantzia ere azpimarratu du eta proposatu du alderdi eta eragileen arteko mahai bat eratzea, baita Legebiltzarraren funtzionamendua salbuespen egoera honi egokitzea ere.