Industriako hainbat lantegitan, zaharren egoitzatan, ikastetxeetan eta zerbitzuetako beste hainbat enpresatan besteak beste, eskatu dute "osasuna, lan baldintzak eta enplegua lehenetsi" ditzatela. ELA, LAB, ESK, STEILAS, Etxalde eta HIRU sindikatuek deitutako protesta ekintza izan da, eta 12:00en bueltan, bost minutuz, geratu egin dira horretarako.
Osasuna eta lanpostuak "arriskuan"
Protesta eginez salatu gura izan dute osasunari dagokionez, oinarrizko zerbitzuetan lanean diharduten langileek "osasuna bermatzen duten neurri prebentiborik gabe" ari direla; eta, oinarrizko zerbitzuetan lan egiten ez duten langileak "lanera joatera behartuta" daudela.
Era berean, lanpostuak arriskuan ikusten dituzte: "Dagoeneko hasi dira behin-behinekoak eta lan prekarioak dituztenak kaleratzen. Enplegua aldi baterako erregulatzeko milaka espediente tramitatu dituzte inongo negoziaziorik gabe". Eta "negoziaziorik gabe egindako ERTE" horien erruz lan baldintzak ere arriskuan daudela gaineratu dute.
