Koronabirusaren zabalkundeari ateak itxi gura dizkio Osasun Sailak eta horretarako neurriak zehaztu dituzte gaur. Umeek, ikastetxera joan aurretik, eta zaharren egoitzetara bisitan doazen lagun guztiek hartu beharko dute tenperatura aurretik, eta 37 gradu izanez gero edo arnasketa arazoak, etxean geratu beharko dute. Zahar etxeetara bisitak murrizteko ere eskatu dute, baina debekurik ez dute ezarri –bakartuta ez badago behintzat–, adinekoendako konpainia oso garrantzitsua dela jakinik.
Umeek 37 gradu izanez gero edo arnasketa arazoak, etxean geratu beharko dute
Gasteizen, Bastidan eta Guardian, ostera, ezohiko neurriak hartu behar izan dituztela adierazi du Nekane Murga Osasun sailburuak, "etxeetara zabal ez dadin" koronabirusa, eta eskolak eten egin dituzte. Era berean, 500 lagunetik gora elkartuko diren lekuetan Osasun Sailetik bideratutako prebentzio neurriak jarraitu beharko dituzte, bereziki eraikin itxiak badira. Horrela, jende pilaketak gerta daitezkeen guneetan, hala nola, leihatiletan, erosleen artean metro bateko distantzia errespetatzeko eskatu dute. Talde jarduerak egiten diren esparru itxiak ere ahal bada ekiditeko eskatu dute. Bi astetarako neurriak dira esandakoak, eta egoera hori gertutik jarraituko dute. Gipuzkoan eta Bizkaian halako neurririk hartu beharrik ez dela izan esan dute kutsatze tasa askoz baxuagoa delako.
Birus berria dela gogorarazi du eta horren aurrean oraindik ez dagoela babesteko bakunarik. Horregatik, nagusiak eta gaixotasun kronikoak babesteak duen garrantzia azpimarratu dute. Era berean, jakinarazi dute eskolak etetearen arrazoia dela umeek kutsatzeko aukera handiagoa dutela bereziki leku itxietan pilatuta baldin badaude eta gero hori zabaldu egiten dutela. Hortaz, kutsatzea eteteko neurria dela azpimarratu dute.
Zergatik hartu da erabakia?
Iñaki Berraondo Osasun sailburuordeak azaldu duenez, neurria hartzearen arrazoiak bi izan dira; bata, pertsona nagusiak babestea, eta bestea, azken egunetako igoera etetea. Haurrak, gune itxietan egoten direnez, "kutsatzeko aukera gehiago" dituzte, eta ondorioz birusa pertsona nagusiengana errazago helarazi dezakete. Bat-batean pertsona asko gaixotuko balira, osasun sistemak "ezingo lioke egoerari behar bezala aurre egin".
Gaineratu duenez, pasa den ostiraletik hona eman den koronabirus kasuen igoerak eragin du gaur hartutako neurria. Dagoeneko EAEn 148 kasu positibo atzeman dira, horietatik hiru adinez txikikoak dira; hirurak Gasteiz ingurukoak. Hala ere, sailburuordeak gogorarazi du, haurrek, normalean, sintoma arinekin pasatzen dutela koronabirusa, eta ez daudela "beldurtuta" eskola adinean dauden neska-mutikoengatik.
Arduratsu jokatzeko deia
Erantzukizunez jokatzeko eskatu diete herritar guztiei, neurri txiki batzuk hartuta kutsatzea ekidin daitekeela gogoraraziz. Eta adinekoak eta gaixotasun kronikoak dituztenak, hau da, arrisku handiena duten kolektiboak gogoan izateko eskatu dute. Osasun Sailean eta Osakidetzan konfiantza izateko ere adierazi dute, neurriak hartzen dabiltzalako eta koronabirusaren gainean daudelako.
