Foru Aldundiak antolaturik eta Gipuzkoako udalei zuzenduta, banda zabal ultralasterraren inguruko lan jardunaldia egin zuten joan den astean Tolosan. Markel Olano diputatu nagusiarekin eta Imanol Lasa Sustapen Ekonomikoko, Turismoko eta Landa Eremuko diputatuarekin batera Bergarako, Eskoriatzako, Leintz Gatzagako, Aretxabaletako eta Oñatiko alkateak izan ziren bertan.
Aldunditik gogorarazi dute 2018. urtean, 2.356.000 euroko inbertsioa egin zela, "eta horri esker, gaur egun, herri txikietako 2.000 baserrik konexio ultralasterra dute". Hala ere, herri txikietan eta landa-eremuetan oraindik 5.200 baserri inguru gelditzen dira konektatzeke. 2023rako Gipuzkoako landa eremuko baserri guztietara zuntz optikoa heltzea gura dute aldunditik, landa-eremuko biztanle gehienek hiriguneetan bizi diren pertsonen bizi eta lan egiteko baldintza berak izan ditzaten.
Azterketa fasean
Hori lortu ahal izateko, herri bakoitzeko egoera aztertu beharko dute Debagoieneko udalek, Izaro Elortza Oñatiko alkateak azaldu duenez: "Zer eremutara eraman behar den eta iritsi ahal den aztertzen gabiltza. Aldunditik telekomunikazioen mapa eguneratzen dabiltza, egoera ikusi eta horren arabera finantziazioa eskatzeko".
Finantziazioa, Aldundiak eta udalek
Hala, finantziazioari dagokionean inbertsioetarako diruaren erdia Foru Aldunditik etorriko litzateken arren, beste erdia udalek finantzatu beharko luketela azaldu du Aretxabaletako alkate Unai Elkorok: "Aztertu egin beharko da, baina etxeko 1200 euroko gastua estimatzen dugu. Erdia Aldundiak ordainduko du eta beste erdia udalek. Dena den, nukleoen arabera eta gune horretako etxebizitza kopuruaren arabera kostuak aldatu daitezke". Aldunditik aurreikusten dute aurten hasi ahal izatea proiektu horretan lanean.