EAEko errepideetan eta kaleetan izandako trafiko-istripuen ondorioz 51 izan ziren hildakoak iaz (43 gizonezkoak eta 8 emakumezkoak); horietako 36 gidariak ziren (16 motor-gidariak, 19 auto-gidariak edo beste ibilgailu batzuen gidariak eta 1 bizikleta-gidaria), 2 autoko bidaiariak eta 13 oinezkoak. 2018an baino 9 gehiago dira guztira, eta horietatik ia % 60 auto-gidariak ez beste kolektibo batzuetakoak izan dira, hau da, motor-gidariak, oinezkoak eta txirrindulariak.
Debagoinean hiru hildako
Gipuzkoan, ostera, 19 lagun hil ziren, horietako hiru Debagoienean: motor-gidari bat Leintz Gatzagan ekainaren 7an, auto-gidari bat Antzuolan ekainaren 26an eta auto-gidari bat Aretxabaletan, urriaren 20an. Araban 10 izan ziren hildakoak eta Bizkaian, 22. Bestalde, 425 zauritu larri izan ziren (2018an baino 16 gutxiago). 2019ko istripuen kopuruari dagokionez, aurreko urtearekin alderatuta "igoera moderatua" izan dela ere aipatu zuten. Abenduaren 26ra arte guztira 8.167 istripu erregistratu ziren (2018an baino 332 gehiago).
Ikastetxeetara bideratutako Don´t be dummy! Zuk ez duzu ordezkorik prebentzio-programaren 2019ko balantzea ere aurkeztu zuten. EAEko 42 udalerritako (6 Araban, 18 Bizkaian eta 18 Gipuzkoan) 138 ikastetxetara iritsi da, baita Debagoienera ere, eta ikasle ugarik hartu dute parte.
