Gazteak aplikazioa deskargatzera gonbidatzeaz gain, parte hartzera ere gonbidatu ditu, izan ere, Zut "ez da aplikazio itxi bat" eta "gazte sortzaileak" nahi dituzte. Aldizkaria hamabostean behin kaleratuko da eta eduki guztiak bertikalean eskaintzen ditu, mugikorrerako diseinatuta baitago.
Aplikazioak atal finko batzuk ditu: Ikus-entzunezko formatuan grabatua eta Instagram stories-en kutsua izango duen elkarrizketa sorta freskoa, arina eta dibertigarria, musika atala, youtuberren iritziak eta hausnarketak bilduko dituen gunea, telesailen gaineko gomendioak, moda aholkuak, esketx formatuan edota era freskoan egindako sexologia tartea eta lehiaketa-erronka atala. Bestalde, Ixa-serie aplikazioa ere Zut-en ikus daiteke, dagoeneko ikusgai daude lehenengo bi atalak.
Elkarlanaren emaitza
Zut, Gaztezuloren eta ADMren artean –ADM, Tokikom, Esguard, Anboto, Baleike, Goiena eta Euskalerria Irratiak osatzen dute– sortutako proiektua da.
