Gipuzkoako erresidentzietako martxa Eskoriatzara eta Arrasatera heldu da gaur. Zaintzaileak zainduz, bizitzak zaindu! lelopean egin dute manifestazioa Eskoriatzako eta Arrasateko kaleetan zehar. "Lau urte daramatzate hitzarmenik gabe eta bi urte pasatu dira negoziazioak hasi zirenetik. Langile horien lan baldintzak hobetzeko hitzarmena adostea ezinbestekoa izango da. Beste alde batetik, gure aiton-amonen bizi kalitatea bermatzeko beharrezkoak diren ratioak edo plantillak hobetzea eskatzen dugu. Lan baldintzak eta gure aiton-amonen bizi-kalitatea daude jokoan", adierazi du ELAko Deba eskualdeko egoitzetako arduradun Janire Diazek.
6.000 euro gutxiago "emakume izateagatik bakarrik"
5.000 langileren lan baldintzak arautzeko negoziazioaren defentsan ari dira. Horrekin batera, ezin da ahaztu erresidentzietako langileen gehiengoa emakumezkoa dela, eta grebalariek salatu dute "emakume izateagatik bakarrik" 6.000 euro gutxiago kobratzen dutela gizonezkoek nagusi diren beste postu batzuekin alderatuta: "6.000 euroko aldea dago, adibidez, zaharren egoitzetako emakume baten eta kale garbitzaile ari den gizonezko baten soldatan".
Jose Arana eta Iturbide
Eskoriatzako eta Arrasateko egoitzen aurretik pasatu dira martxak, bertan grebalariak dituzte-eta: "Langile askotxo ditugu bi egoitza horietan greban eta gu oso pozik gaude bertako langileak greba deialdiari ematen ari diren jarraipenarekin", gaineratu du Diazek.
Martxa urriaren 18an amaituko da, Donostian
Urriaren 7an Donostian hasi zuten martxa eta hilaren 18an Donostian bertan bukatuko dute. Grebari jarraipen handia egiten ari zaiola dio ELAk eta pozik daude, beti hobetu badaiteke ere, ekimena oraingoz izaten ari den oihartzunarekin.
