Pili Kaltzada kazetari eta idazleak izan du ekitaldia hasteko ardura. Adierazi du, bizikidetza oinarri duen gizarte justu batera egin gura duela bidea euskal gizarteak eta hala, ez duela espetxe politika jasaten dutenen eskubideen urraketarik nahi.
Manifestuak, 2011ko Aieteko adierazpeneko hirugarren puntua ere nabarmendu du izan ere, hark, "adiskidetzean aurrera egiteko pausuak eskatzen zituen". Espainiako gobernuari ere egin diote erreferentzia: "Hasieran, Espainiako gobernu berriak eman zituen urratsek sortu zuten esperantza bertan behera gelditu da. Hitza betetzen ez duen gobernu baten aurrean gaude. Gatazkaren ondorioak gainditzeko eskatzen du gizarteak eta Espainiako gobernuak ez du ulertu gura".
Salbuespenezko espetxe politikarekin behin betikoz bukatzeko garaia dela ere esan du Kaltzadak eta gogora ekarri, 200 presok baino gehiagok, "gizatasun izpirik gabeko tratua jasotzen" dutela. "Legea betetzeko garaia da", adierazi du. Gaixo larriek etxean behar luketela, Europan betetako urteak kontatzen hasi behar liratekeela, eta presoak euren etxeetara gerturatzen hastea ezinbestekoa dela, besteak beste.
Bukatzeko, Kataluniako preso politikoak izan dituzte gogoan Bilbon, bai eta Altsasuko gazteak ere.
