TOKIKOM kazetaritza sariak 2017 deialdira aurkeztu diren lanen artean irabazleak aukeratzeko epaimahaia Amaia Pavon Arrizabalagak, Maria Gonzalez Gorosarrik eta Edorta Arana Arrietak osatu dute. Hiru kategorietan banatu dituzte kazetaritza sariak: Azal onena, Eduki onena eta Ikus-entzunezkoa. Goiena Komunikazio Taldeak, bi ataletan lortu du finalista izatea, eta horretaz gaina aipamen berezia jaso du hiru kategorietatik at.
Monika Belastegi lankidea, 'Puntua' aldizkariak @toki_kom sarietan jasotako aipamen berezia saria jasotzen. Zorionak talde!!! pic.twitter.com/QHgDD906Z8
— Goiena Albisteak (@goiena) 2017(e)ko urriak 27
Apirilaren 25ean hasi zen Goiena telebistan Xabi Urzelai kazetariak gidatzen duen erreportaje saioa. Programan kirolari debagoiendarrak gertutik ezagutzeko aukera eskaintzen da.
TOKIKOM 2017 SARIAK
2017ko euskarazko iragarkirik onena
Labrit multimediaren Erronkariko gazte telebistako spotak irabazi du.
KAZETARITZA ARLOA
2017ko azalik onena
Hiruka astekariaren Itsasadarrean, bizirauten azala.
Beste bi finalistak: Puntua astekariaren Garoña azala eta Anboto astekariaren Martxoak 31 azala
2017ko edukirik onena
Anboto astekariaren Martxoak 31 monografikoari.
Beste bi finalistak: Geuria hilabetekariaren Trena gertu dugunean erreportajea eta Karkara hamaboskariaren Hura bai martxa erreportajea.
2017ko ikus-entzunezko kategoria
Baleikeren Tapa-Pala II bideo sorta.
Beste bi finalistak: Goiena telebistak aurkeztutako #HRMT saioa eta Anboto astekariaren Paperak dokumentala.
Aipamen bereziak
Hirukaren udako ale monografikoa eta Puntua astekariak genero berdintasunarekin erakutsitako konpromisoa.
TOKIKOM sariak ekitaldia
Jone Guenetxeak, Tokikom-eko zuzendariak hartu du lehenik hitza ekitaldira ongi etorria emateko. Guenetxeak azpimarratu nahi izan du sari banaketak tokiko komunikabideetako kazetarien lana "balioan" jartzen laguntzen duela.
Xabier Arregi Usurbilgo alkatea igo da ostean oholtzara, tokiko komunikabideak "eskualdeen kohesioa eta dinamizazioan" duten garrantzia nabarmendu du; komunikabideen lana goraipatu du, eta hauek euskararen alde egindako hautua azpimarratu du: "Zuen balioak konpartitzen ditugu; euskaraz diharduzue, eta gertutik".
Mikel Irizar, Gipuzkoako Foru Aldundiko Hizkuntza Berdintasuneko zuzendariak, adierazi du tokiko komunikabideek "euskara nagusitasun posizio batera" eramaten laguntzen dutela, egindako lanarekin "dimentsio nazionala" emanez. Nabarmendu du, baita ere, "Komunikazioa eta ikus-entzunezkoa gauza bera" bilakatzen ari direla.
Ongi etorria ixteko, Estibalitz Alkortak, Eusko Jaurlaritzako Kultura eta Hizkuntza Politikako sailburuordeak azpimarratu du Tokiko komunikabideek "euskararen biziberritzean" duten "garrantzia". Instituzioen aldetik pausuak eman behar direla eta "elkarlana" dela bidea esan du.
Ostean lehenengo hitzaldiaren txanda izan da. Publizitatea, moduluez haratago izan da, Xavi Jimenezek gidatuta. Publizitatea eta marketin digitalaz jardun da, arlo horretan hedabideak non kokatzen diren azalduz, tartean hedabide lokalak. Hitzaldia amaitu eta jarraian banatu dituzte aipatutako 2017ko deialdiko TOKIKOM sariak.
Ekitaldia amaitzeko, bigarren hitzaldia eskainiko du Filip Vranckx-ek, Het Belang van Limburg hedabidearen esperientzian oinarrituta, hiperlokala eta digitalazaz jardungo du.
