Mondragon Unibertsitateko Oñatiko Fakultatean Lidergo Ekintzaile eta Berrikuntza ikasten ari diren hiru lagunek osatzen dute Aldazank. Duela urte bete sortuta, Enpresek berdintasunaren arloak aurrerapausoak emateko dituzten arazoak ikertzen ditu.
Enpresetako goi karguetan gehienak gizonezkoak zirela ikusirik etorri zen hausnarketa ikasle talde honetara. Erabaki zuten, zerbait egin behar zutela errealitate hori aldatzeko.
Beste adarrak dira nazioartea eta hezkuntza, baina bereziki orain, enpresaren eta kontziliazioaren alorrean ari dira lanean. Lerro horretan lehen pausua izan da ikerketa bat bultzatzea helburu jakin batekin; informazioa biltzea enpresetan berdintasuna bultzatzeko garaian erakunde horiek aurkitu ohi dituzten arazoak identifikatu ahal izateko. 35 enpresekin ari dira lanean dagoeneko, tartean bailarakoak, esaterako Laboral Kutxa, Mondragon unibertsitatea edota ULMA.
Ikerketa honek Gipuzkoako Foru Aldundiaren babesa du, Berdintasun zuzendari Miren Elgarrestak adierazi moduan, Aldazank egitasmoa erabat uztartzen da Etorkizuna Eraikiz proiektuaren baitan jarriko den programa pilotuetako batekin, zeinetan kontziliazioaren gaia landuko den.
Gaurtik, bion artean eraikiz lemapean, gai horrek duen garrantzia zabaldu nahi dute gizartean eta horretarako eskumuturreko bat garatu eta salmentan ipini dute. Hilabete baten 1.500 pultsera edo eskumuturreko saldu dituzte. Eroskiren dendetan ipini dituzte salgai.
